კვირის ახალი მუსიკალური რელიზები

საერთაშორისო რელიზები

ჰარი სტაილსმა ახალი სინგლი „Aperture“ გამოუშვა, რომელიც მისი მომავალი მეოთხე სტუდიური ალბომის – Kiss All the Time. Disco, Occasionally-ს ნაწილია. მუსიკოსმა ცოტა ხნის წინ ალბომის მხარდამჭერი ტურნეც დააანონსა, რომელიც შვიდ ქალაქს მოიცავს. 23 იანვარს სტაილსმა სიმღერაზე გადაღებული ვიდეოკლიპიც გამოაქვეყნა, რომლის რეჟისორი ობ პერია.

სტაილსი არ არის One Direction-ის ერთადერთი ყოფილი წევრი, რომელმაც ამ კვირაში ახალი მუსიკა შემოგვთავაზა. Billboard-ის ყდის ვარსკვლავმა ლუი ტომლინსონმა თავისი მესამე სოლო ალბომი – How Do I Get Here? გამოუშვა. ნამუშევარი მისი წინა სტუდიური ალბომის, Faith In the Future-ის გაგრძელებაა, რომელმაც Billboard 200-ში მეხუთე ადგილი დაიკავა.

ამ კვირას R&B სცენაზეც სამი მნიშვნელოვანი ალბომი გამოვიდა: არი ლენოქსის Vacancy, Camper-ის Campilation და Nija-ს ჰიპ-ჰოპის ელემენტებით გაჯერებული What I Didn’t Say. ასევე, ქანთრი მუსიკის ახალი სახე – კაშუს კალპეპერი მსმენელის წინაშე წარდგა 18-სიმღერიანი სადებიუტო ალბომით –  Act I.

თუ 2010-იანი წლების განმსაზღვრელ ბენდებზე ვსაუბრობთ, Arctic Monkeys ერთ-ერთი ყველაზე მნიშვნელოვანი კოლექტივია. ბენდი დაბრუნდა სიმღერით Opening Night, რომელიც 1995 წლის კომპილაციის – Help-ის დაანონსებული გაგრძელებისთვის ჩაიწერა. ალბომი, სახელწოდებით Help (2) საქველმოქმედო ორგანიზაცია War Child-ის მხარდასაჭერად გამოვა და მასში მონაწილეობას მიიღებენ Pulp, Fontaines D.C., ოლივია როდრიგო და სხვა არტისტები.

იაპონურმა ვოკალურმა ჯგუფმა XG-იმ დიდი ხნის მოლოდინის შემდეგ თავისი სადებიუტო სრულმეტრაჟიანი ალბომი The Core გამოუშვა. კვირის განმავლობაში ახალი სინგლები ასევე გაავრცელეს: ჰოლი ჰამბერსტონმა (To Love Somebody), Fred again.. & Young Thug-მა (Scared), ქლეო სოლისმა (Nothing Is Impossible With You), ეშლი მაკბრაიდმა (What If We Don’t), ჯოის რაისმა (Break Me In), ჯეიმს ბლეიკმა (Death of Love) და ჯესი უერმა (I Could Get Used to This).

ქართული რელიზები

გიორგი თორაძემ, სასცენო სახელით Torcho, ახალი მუსიკალური ვიდეო გამოუშვა. კლიპი გადაღებულია სიმღერაზე „ტაქსი“. ვიდეოს რეჟისორია ლევან ლეკო ჭყონია, რომელიც ასევე მუშაობდა Torcho-ს 2024 წლის სადებიუტო კლიპზე – „კარმა“. მუსიკისა და ტექსტის ავტორი ჯემალ ბაღაშვილია, პროდიუსერები – გიორგი სანოძე და გიორგი ბულბულაშვილი, მიქსინგსა და მასტერინგზე კი ნიკა მარგველაშვილმა იმუშავა. 

ქართველმა არტისტმა და მუსიკალურმა პროდიუსერმა Creams-მა ახალი კლიპი – Plastic Supernova გამოუშვა. ვიდეოს შემოქმედებით იდეაზე Creams-მა სალომე ცაბუტაშვილთან ერთად იმუშავა. Creams მუსიკალურ სცენაზე 2019 წლიდან აქტიურად გამოჩნდა. 2020 წლიდან ის კომპანია Sony Music Group-ის მუსიკალურ ლეიბლ AWAL Records-თან თანამშრომლობს.

21 იანვარს ქართველმა ანონიმურმა ჰიპ-ჰოპ არტისტმა Mamaflex-მა ახალი ალბომი – Retired Crashout გამოსცა, რომელიც 15 ტრეკს აერთიანებს. ნამუშევარი, არტისტის წინა ალბომების მსგავსად, მუსიკალურ კოლაბორაციებს მოიცავს. Mamaflex მუსიკალურ სივრცეში პირველად 2018 წელს გამოჩნდა. მისი პირველი ტრეკი იმავე წელს გამოქვეყნდა და მალევე მოიპოვა პოპულარობა საქართველოში. არტისტის მუსიკა ექსპერიმენტულ ტრეპსა და ჰიპ-ჰოპის ჟღერადობას აერთიანებს. ის საკუთარ იდენტობას მალავს – მუსიკალურ ვიდეოებსა და ლაივ გამოსვლებზე ყოველთვის ნიღბით ჩნდება.

21 იანვარს ალტერნატიულმა ჰიპ-ჰოპ ბენდმა MokuMoku-მ ახალი სინგლი – Manta Ray გამოუშვა. ტრეკი მუსიკალურმა ლეიბლმა Stockton Records-მა გამოსცა. 2026 წლის იანვარში სტრიმინგ პლატფორმა Spotify-ზე MokuMoku-ს ყოველთვიური მსმენელების რაოდენობამ 100 000-ს მიაღწია, რაც ქართულ ბენდებსა და სოლო არტისტებს შორის ერთ-ერთ ყველაზე მაღალ მაჩვენებლად ითვლება. MokuMoku 2014 წელს ჩამოყალიბდა და მისი ჟანრობრივი სტილი ჰიპ-ჰოპის, როკისა და ფანკის ელემენტების სინთეზს აერთიანებს.