Snoop Dogg აშშ-ის ნაკრების წარმომადგენლად დაბრუნდა. რეპერს პატივი ხვდა, ჩრდილოეთ იტალიის ქუჩებში ოლიმპიური ჩირაღდანი ეტარებინა 2026 წლის ზამთრის ოლიმპიადამდე, რომელიც მილანსა და კორტინაში გაიმართება.
ამჯერად სნუპი განსხვავებული ფორმით წარდგა. აშშ-ის ნაკრების ოლიმპიურ ფორმაში გამოწყობილი რეპერი, რომლის შარვალზეც ეწერა „მწვრთნელი სნუპი”, გალარატეს ქუჩებში ჩირაღდნით ხელში ამაყად წარმოაჩენდა თავის ქვეყანას.
„მე წარმოვადგენ მშვიდობასა და სიყვარულს და ჩემთვის დიდი პატივია ამ ჩირაღდნის ხელში ჭერა,” – ამბობს რეპერი ვიდეოში. „მინდა, სიყვარული გავავრცელო სპორტსმენებში, იტალიელ ხალხსა და მთელ მსოფლიოში, რადგან სწორედ ესაა ოლიმპიადის არსი – მშვიდობისა და სიყვარულის გავრცელება.”
მას შემდეგ, რაც 2024 წლის პარიზის ოლიმპიურ თამაშებზე მაყურებელი თავისი დასამახსოვრებელი გამოსვლით მოხიბლა, სნუპი NBC-ის ეთერში დაბრუნდება, როგორც სპეციალური კორესპონდენტი მილანი-კორტინას თამაშების გასაშუქებლად.
და ეს ჯერ კიდევ ყველაფერი არ არის – რეპერი ისტორიაში შევა, როგორც აშშ-ის ნაკრების პირველი საპატიო მწვრთნელი 2026 წლის ზამთრის ოლიმპიურ თამაშებზე.
„აშშ-ის ნაკრებს პირველი საპატიო მწვრთნელის რანგში ვუერთდები. ეს არის როლი, რომელიც მოიცავს სპორტსმენების მხარდაჭერასა და დაფასებას იმის მიღმა, რასაც მაყურებელი მოედნებზე ხედავს,” – დაწერა რეპერმა LinkedIn-ზე. „აქ იმისთვის ვარ, რომ ჩემი ხმა, ჩემი გული, და შესაძლოა ცოტა გამოცდილებაც, გამოვიყენო აშშ-ის ნაკრების მოტივაციისთვის, წარმოვაჩინო ათლეტების სპორტული გზა და ის ადამიანები, ვინც მათ ამ ოცნებების ახდენაში ეხმარება.”
სნუპი NBC-ის გაშუქებას საკუთარ უნიკალურ პერსპექტივას შესძენს. ის შემოგვთავაზებს პრაიმტაიმ სიახლეებსა და ინტერვიუებს ოლიმპიადის ტრანსლაციის წამყვან მაიკ ტირიკოსთან ერთად. 2026 წლის ზამთრის ოლიმპიადის გახსნის ცერემონია 6 თებერვალს შედგება და პირდაპირი ეთერით გადაიცემა NBC-სა და Peacock-ზე.
ნახეთ Snoop Dogg-ის ვიდეო:
