2026 წლის იანვარში Apple TV-ზე მხატვრული სერიალის – DROPS OF GOD-ის მეორე სეზონის პრემიერა შედგა. სერიალი მაყურებელს ღვინის კულტურისა და გასტრონომიის სამყაროს შესახებ უყვება. ახალი ეპიზოდების ნაწილი საქართველოში გადაიღეს. შოუს მეორე სეზონის მესამე ეპიზოდში ქართველი არტისტის, გიორგი თორაძის, იგივე Torcho-ს კომპოზიცია „გეწყინა?!” გაჟღერდა. აღნიშნულ ეპიზოდში მოქმედება საქართველოში ვითარდება და შოუს მთავარი გმირები ერთ-ერთ ქართულ სოფელს განსაკუთრებული ღვინის აღმოსაჩენად სტუმრობენ.
„ჯერ კიდევ ზაფხულში დაგვიკავშირდნენ Apple TV-ის წარმომადგენლები და დაახლოებით ექვსი თვის განმავლობაში მიმდინარეობდა მოლაპარაკება „გეწყინა?!”-ს სერიალში გამოყენებასთან დაკავშირებით. მე და ჩემი გუნდი ძალიან ბედნიერები ვართ, რომ საბოლოოდ ეს თანამშრომლობა შედგა,” – ამბობს Torcho.
Drops of God დაფუძნებულია New York Times-ის ბესტსელერ იაპონურ მანგაზე. სიუჟეტი უზარმაზარი ღვინის კოლექციის მემკვიდრეობისთვის კონკურენციაზე მოგვითხრობს.
Drops of God-ის პრემიერა Apple TV+-ზე 2023 წლის 21 აპრილს შედგა, 2024 წელს კი საუკეთესო დრამატული სერიალის კატეგორიაში International Emmy Award მიიღო.
აღსანიშნავია, რომ სერიალის მეორე სეზონში როლებს ქართველი მსახიობებიც ასრულებენ.
