ალბომ The Life of a Showgirl-ის გამოსვლიდან ოთხი თვის შემდეგ, ტეილორ სვიფტმა პროექტიდან მეორე მუსიკალური ვიდეო დააანონსა: სიმღერა Opalite-ის ვიდეოკლიპი 6 თებერვალს Spotify-სა და Apple Music-ზე გამოქვეყნდება.
პოპვარსკვლავმა განცხადება საკუთარ ვებგვერდზე განათავსა და სპეციალური ათვლის ტაიმერიც ჩართო. Apple Music-სა და Spotify-ზე პრემიერის შემდეგ, 8 თებერვალს, ვიდეოკლიპი YouTube-ზეც გახდება ხელმისაწვდომი.
ალბომი The Life of a Showgirl 3 ოქტომბრის რელიზის შემდეგ, Billboard 200-ის ჩარტში პირველ ადგილზე მოხვდა და საერთო ჯამში ლიდერ პოზიციაზე 12 კვირა დაჰყო. Luminate-ის მონაცემებით, პირველ კვირაში აშშ-ში ალბომის რეკორდული რაოდენობა – 4.002 მილიონი ეკვივალენტური ერთეული გაიყიდა. იმავე კვირაში The Fate of Ophelia – Billboard Hot 100-ში პირველ ადგილზე მოხვდა, მას კი მეორე პოზიციაზე Opalite მოჰყვა, რაც ამ დროისთვის სიმღერის საუკეთესო მაჩვენებელია.
ვიდეოს პრემიერის შესახებ ტეილორ სვიფტის გადაწყვეტილება, რომ პირველად პრემიერა Spotify-სა და Apple Music-ზე შემდგარიყო, YouTube-ის დეკემბრის განცხადებას მოჰყვა, რომლის მიხედვითაც პლატფორმა Billboard-ის ყველა ჩარტიდან საკუთარი სტრიმინგ მონაცემების ამოღებას გეგმავს.
YouTube-ის გადაწყვეტილება წინ უძღოდა Billboard-ის 16 დეკემბრის განცხადებას ჩარტების მეთოდოლოგიის ცვლილების შესახებ. კერძოდ, ფასიანი გამოწერის მქონე (Premium) სტრიმინგებს უფრო მეტი პრიორიტეტი მიენიჭება, ვიდრე უფასო, რეკლამებზე დაფუძნებულ სტრიმინგებს. აღნიშნული ცვლილება მიზნად ისახავს მომხმარებელთა ცვალებადი ქცევისა და მუსიკალურ ინდუსტრიაში სტრიმინგიდან მიღებული შემოსავლების ზრდის ზუსტ ასახვას.
მუსიკალური ვიდეოს გარდა, ტეილორ სვიფტმა Opalite-ის 7-ინჩიანი ვინილის სინგლიც დააანონსა, რომელიც მის ონლაინ მაღაზიაში მხოლოდ 48 საათის განმავლობაში იქნება ხელმისაწვდომი.
