მუსიკოსმა მარიამ გალოგრემ ინოლა გურგულიას ცნობილი სიმღერის, სახელწოდებით „შენთან” ქავერ ვერსია გამოაქვეყნა.
მარიამ გალოგრე:
„ინოლა გურგულიას შემოქმედებას უდიდეს პატივს ვცემ და მის სიმღერებს ყოველთვის მთელი გულით და სულით ვასრულებ ჩემს ლაივზე. კონკრეტულად ამ სიმღერის ქავერის ჩაწერის იდეა ჩემს პიანისტთან, ანატოლი ვოლოჩაისთან საუბრისას დამებადა. სწორედ მას ეკუთვნის არანჟირების ნაწილი.”
მუსიკოსის თქმით, პარტიების მიქსში და ბასის ჟღერადობაში ცვლილებების გამო, პროექტზე მუშაობას დაახლოებით ერთი წელი დასჭირდა.
მარიამ გალოგრე:
„ვიდეოს გადაღებაში დახმარება ჩემს მეგობარს, საბა ჩაჩუას ვთხოვე და ისიც სიამოვნებით დამთანხმდა. მიუხედავად იმისა, რომ ძალიან კმაყოფილი ვიყავი როგორც ჩანაწერით, ასევე ვიდეოთი, ამხელა გამოხმაურებას ნამდვილად არ ველოდი. გულწრფელად მიხარია, რომ ჩემი ნამღერით ადამიანებს ის სითბო გავუზიარე, რასაც ყოველთვის ვგრძნობ, როცა ვმღერი. მადლობელი ვარ ჩემი მეგობრების, რომლებიც დამეხმარნენ ამ პროექტის განხორციელებაში და იმ უცხო ადამიანების, რომლებიც მწერდნენ, რომ Spotify-ზე დამედო ჩანაწერი, რათა უკეთეს ხარისხში შესძლებოდათ მოსმენა.”
მარიამი ამჟამად მსგავსი სტილის ქავერებსა და არანჟირებებზე მუშაობს. მისი თქმით, აქვს როგორც სოლო, ასევე კოლაბორაციული საავტორო პროექტების იდეებიც.
