მსმენელი კვლავაც ელის ლანა დელ რეის მომავალ ალბომს, სახელწოდებით Stove, თუმცა 17 თებერვალს მუსიკოსმა ფანებს ახალი სინგლი – White Feather Hawk Tail Deer Hunter გაუზიარა.
სიმღერა დაწერილია მის მეუღლესთან, ჯერემი დუფრენთან ერთად, რომელზეც მომღერალმა 2024 წლის სექტემბერში იქორწინა. ტრეკი ასახავს მომღერლის სიყვარულსა და ერთგულებას პარტნიორის მიმართ. შინაარსი არტისტისათვის დამახასიათებელ, მისტიკურ სტილშია.
ტრეკის პროდიუსერი და თანაავტორი მომღერლის ხშირი კოლაბორატორი ჯეკ ანტონოფია.
თებერვლის დასაწყისში, როდესაც სიმღერის გამოშვება დააანონსა, დელ რეიმ მას მომავალი ალბომიდან თავისი „რჩეული“ უწოდა. „ეს ის სიმღერაა, რომელსაც ველოდებოდი,“ – თქვა მან და აღნიშნა, რომ დიდი ხნის ნანატრი ალბომი, სავარაუდოდ, სამ თვეში იქნება მზად.
ახალი ალბომი არტისტმა ჯერ კიდევ 2024 წლის იანვარში, Billboard x NMPA-ს დაჯილდოებაზე დააანონსა და განაცხადა, რომ ის ქანთრი ჟანრის იქნებოდა. მისი პირველი სინგლი – Henry, Come On 2025 წლის აპრილში გამოვიდა. ამ დროს ალბომის სახელწოდება იყო The Right Person Will Stay. მოგვიანებით მან ჩანაწერის გამოშვება გადადო, სახელიც შეუცვალა და Stove დაარქვა.
მომღერალმა ბოლო ალბომი 2023 წელს გამოუშვა. ნამუშევარმა – Did You Know That There’s a Tunnel Under Ocean Blvd – Billboard 200-ის ჩარტში მესამე ადგილი დაიკავა.
მოუსმინეთ ლანა დელ რეის ახალ სიმღერას – White Feather Hawk Tail Deer Hunter:
