ემერალდ ფენელის ფილმში, რომელიც ემილი ბრონტეს კლასიკური რომანის, „ქარიშხლიანი უღელტეხილის“ (Wuthering Heights) ეკრანიზაციაა, მარგო რობი სრულად გარდასახული იყო თავის პერსონაჟში. ერთ-ერთ ეპიზოდში მსახიობმა გადასაღებ მოედანზე კეიტ ბუშის ლეგენდარული სიმღერის, Wuthering Heights-ის ცეკვაც გააცოცხლა. 16 თებერვალს მეტყველების პედაგოგმა უილიამ კონაჩერმა ინსტაგრამზე პოსტები გააზიარა, სადაც მარგო რობი, ჯეიკობ ელორდი და ფილმის სხვა მსახიობები მუშაობის პროცესში ჩანან.
ვიდეოში პერსონაჟის კოსტიუმში გამოწყობილი მარგო რობი კეიტ ბუშის სადებიუტო, გოთიკური სინგლის ცნობილ ცეკვას იმეორებს.
„შესაძლოა, ფილმში მარგო რობის პერსონაჟს მძიმე ბედი აქვს, თუმცა გადაღებებზე ჩვენ ძალიან კარგი დრო გავატარეთ. აი, ბედნიერი მარგო დღის ბოლოს, გადასაღებ მოედანზე.” – დაწერა პოსტში უილიამ კონაჩერმა.
კეიტ ბუშმა Wuthering Heights 1978 წელს გამოუშვა, სიმღერა მისი სადებიუტო ალბომის, The Kick Inside-ის წამყვანი სინგლია. სიმღერამ დიდ ბრიტანეთში ოფიციალურ ჩარტებში ოთხი კვირის განმავლობაში პირველი ადგილი შეინარჩუნა.
მიუხედავად იმისა, რომ სიმღერა გადაღებების პროცესში მნიშვნელოვან როლს თამაშობდა, ფილმის ოფიციალური საუნდტრეკი Charli XCX-ს ეკუთვნის. Charli XCX-მა ამავე სახელწოდების ალბომი 13 თებერვალს, სწორედ იმ დღეს გამოაქვვეყნა, რა დღესაც ემერალდ ფენელის ფილმის პრემიერა შედგა.
კეიტ ბუშმა ახალი ნამუშევარი 50 Words for Snow ბოლოს 2011 წელს წარადგინა. მოგვიანებით კი განაცხადა, რომ ახალ სტუდიურ ალბომზე სურს მუშაობის დაწყება. „უამრავი იდეა მაქვს, ძალიან მინდა შემოქმედებით პროცესს ისევ დავუბრუნდე – დიდი დრო გავიდა.“ – აღნიშნა 2024 წელს BBC Radio 4-თან საუბარში მომღერალმა.
ამასთანავე, 2022 წელს სერიალ Stranger Things-ში გაჟღერებულმა მუსიკოსის 1985 წლის ჰიტმა Running Up That Hill კვლავ დაიბრუნა დიდების მწვერვალი, იმავე წელს სიმღერა Billboard Hot 100-ში ხელახლა მოხვდა და მესამე ადგილი დაიმკვიდრა. 2025 წელს კი, სერიალის მეხუთე სეზონის პრემიერის შემდეგ, სიმღერა Top TV Songs-ის ჩარტში პირველ ადგილზე დაბრუნდა.
