იტალიაში მიმდინარე ზამთრის ოლიმპიურ თამაშებზე საქართველოს სახელით მოასპარეზე წყვილმა, დიანა დევისმა და გლებ სმოლკინმა, მაყურებელი და კრიტიკოსები მოულოდნელი მუსიკალური არჩევანით გააოცა. ფიგურული სრიალისთვის დამახასიათებელი კლასიკური მელოდიების ნაცვლად, წყვილმა ყინულზე როკ-პერფორმანსი მოაწყო და ლეგენდარული პანკჯგუფის, The Offspring-ის ჰიტზე, Pretty Fly (For A White Guy)-ზე იცეკვა.
ამ გამოსვლამ სოციალურ ქსელებში დიდი გამოხმაურება გამოიწვია. ვიდეო კი თავად The Offspring-ის ოფიციალურ ინსტაგრამ და ფეისბუქ გვერდებზე გამოქვეყნდა. ბენდმა საქართველოს სახელით მოასპარეზე წყვილის გამოსვლა მოიწონა და აღტაცებაც არ დამალა.
„14 წლის ასაკში ვინმეს რომ ეთქვა, ამ სიმღერას ოლიმპიადაზე მოვისმენდი, ვიფიქრებდი, რომ მეხუმრებოდით“, – წერია Offspring-ის მიერ გამოქვეყნებული ვიდეოს ტიტრებში.
ერთი დღის წინ გამოქვეყნებულ ვიდეოს სოციალურ ქსელში უკვე 2 მილიონზე მეტი ნახვა აქვს:
The Offspring-ის პოსტს თავად სპორტსმენებიც გამოეხმაურნენ, გლებ სმოლნიკი ბენდს კომენტარში უწერს: „დიდი მადლობა!! ყოველ ჯერზე, როცა თქვენი მუსიკის ფონზე ვსრიალებთ, ეს ჩვენთვის ნამდვილი დღესასწაული და დიდი სიამოვნებაა!!! “
„ჩვენთვის დიდი პატივია თქვენს მუსიკაზე სრიალი,“ – აღნიშნავს დიანა დევისი.
დიანა დევისისა და გლებ სმოლნიკის წყვილმა ზამთრის ოლიმპიადაზე გამოსვლა 196.02 ქულით, მეცამეტე ადგილით დაასრულა.
