ნიკოლაი კომიაგინი, რუსული ექსპერიმენტული ჯგუფის, Shortparis-ის ფრონტმენი, 39 წლის ასაკში გარდაიცვალა. ინფორმაცია თავდაპირველად გამოცემა Clash-მა გაავრცელა, მოგვიანებით კი ჯგუფის მენეჯერმა, მარინა კოსუხინამ ინსტაგრამზე დაადასტურა: „ნიკოლაი აღარ არის ჩვენთან“. სიკვდილის ოფიციალური მიზეზი ჯერჯერობით უცნობია, თუმცა ადგილობრივი რუსული მედიის ცნობით, სავარაუდოდ, მას კრივის ვარჯიშის შემდეგ გული გაუჩერდა.
Shortparis სანქტ-პეტერბურგში 2012 წელს ჩამოყალიბდა. ნიკოლაი კომიაგინი ჯგუფის ვოკალისტი, კლავიშისტი და იდეოლოგი იყო. მათი პირველი ალბომი Docheri 2013 წელს გამოვიდა, რასაც 2017 წელს მოჰყვა Paskha. 2015 წელს მათ სანქტ-პეტერბურგში კონცერტი ჯგუფ The Kooks-ისთვის გამართეს, ხოლო 2017-ში – alt-J-ისთვის. მათი შოუები ცნობილი იყო პროვოკაციული, პერფორმანს-არტზე დაფუძნებული მიდგომით.
ჯგუფმა ფართო აღიარება მხოლოდ 2018 წელს, პოლიტიკურად დამუხტული კლიპის, Strashno-ს გამოსვლის შემდეგ მოიპოვა. ამის შემდეგ Shortparis სწრაფად იქცა რუსეთის ერთ-ერთ ყველაზე თვალსაჩინო ოპოზიციურად განწყობილ ჯგუფად და საერთაშორისო ინტერესიც გამოიწვია. 2019 წელს მათ პირველი ტურნე დიდ ბრიტანეთში გამართეს, სადაც Liverpool Sound City-სა და The Great Escape-ის ფესტივალებზე წარდგნენ.
გარდა მუსიკისა, ნიკოლაი კომიაგინმა ითამაშა კირილ სერებრენიკოვის ორ ფილმში: „ზაფხული“ (Leto) და „ლიმონოვი: ბალადა ედიზე“, ასევე შეასრულა საკულტო რუსი პოეტის, ვლადიმერ მაიაკოვსკის როლი სერიალში „კარამორა“.
2026 წლის მონაცემებით, ჯგუფი კვლავ რუსეთში რჩებოდა, ეს გადაწყვეტილება მათი პოლიტიკური პოზიციის ნაწილი იყო, მიუხედავად იმისა, რომ სამშობლოში მოღვაწეობა ფაქტობრივად აკრძალული ჰქონდათ და კონცერტებიც გაუუქმდათ. აღსანიშნავია, რომ Shortparis 2025 წლის 4 ნოემბერს თბილისსაც ეწვია და Elektrowerk-ის სცენაზე კონცერტი გამართა.
