პირველად, 33 წლის შემდეგ, Mother on Mondays-ის ალბომი Clear and Cold ოფიციალურად გამოვიდა. მისი მოსმენა ახლა უკვე „იუთუბსა” და „სპოტიფაიზე” შეგიძლიათ.
Clear and Cold ჯგუფის პირველი ალბომი იყო, რომელიც 1993 წელს, მათი დაარსებიდან ერთ წელიწადში ჩაიწერა. მასში შემავალი სიმღერები, რომლებიც პოსტ-პანკსა და ინდი-როკს აერთიანებს, იმ პერიოდში ძირითადად კონცერტებზე სრულდებოდა. ჩანაწერი ოფიციალურად არასდროს გამოსულა და ამ დრომდე დაკარგულად მიიჩნეოდა.
როგორც სოციალურ ქსელში ვკითხულობთ, ალბომი შემთხვევით ჯგუფის წევრების მეგობრის, ოთო ჟღენტის კოლექციაში, აუდიო კასეტაზე აღმოაჩინეს, საიდანაც ის გაციფრულდა და უკვე განახლებული მიქსინგითა და მასტერინგით ოფიციალურად პირველად გამოიცა.
Mother on Mondays 90-იანების ქართული ალტერნატიული ბენდია, რომელიც სამი სხვადასხვა ჯგუფის შეერთებით შეიქმნა. ესენია: Shadow, Mysteria და Out of Need. ბენდის თავდაპირველი წევრები იყვნენ: გოგლიკ ფარეშიშვილი (ვოკალი), გოგი ძოძუაშვილი (ბასი, ვოკალი), ლევან ჯავახიშვილი (გიტარა), დათო ჩხიკვიშვილი (გიტარა) და ვაჟა ბექაური (დრამი). სწორედ ამ შემადგენლობით ჩაიწერა მათი პირველი ალბომი Clear and Cold.
მოუსმინეთ ალბომს:
