კონცერტები და მუსიკალური ღონისძიებები, რომლებიც მექსიკის რამდენიმე შტატში იყო დაგეგმილი, გაუქმდა ან გადაიდო მას შემდეგ, რაც მექსიკის შეიარაღებულმა ძალებმა სამხედრო ოპერაცია განახორციელეს მსოფლიოს ყველაზე საშიში ნარკობარონის, რუბენ ნემესიო ოსეგუერას წინააღმდეგ. ამ ამბავმა კი ქვეყნის რამდენიმე რეგიონში ძალადობრივი ტალღა გამოიწვია. მექსიკის მინიმუმ 10 შტატში კვლავ აქტიური რჩება განგაშის წითელი სიგნალი.
შედეგად, Kali Uchis-ის კონცერტი, რომელიც გვადალახარაში კვირას უნდა გამართულიყო, გაუქმდა. ორგანიზატორების განცხადებით, მყიდველებს ბილეთების თანხა სულად დაუბრუნდებათ. თუმცა კოლუმბიელ-ამერიკელი მომღერლის შოუ, რომელიც ამ ოთხშაბათს მეხიკოშია დაგეგმილი, არსებული მონაცემებით, კვლავ ძალაშია. ქვეყანაში მიმდინარე მოვლენების გამო გაუქმდა სხვა მუსიკოსების კონცერტებიც, რომლებიც ასევე კვირა დღეს იყო დაგეგმილი.
ცოტა ხნის წინ ხალისკოს გუბერნატორმა პაბლო ლემუსმა სოციალურ მედიაში განაცხადა, რომ შტატი განგაშის წითელ სიგნალს ააქტიურებდა, რათა მოსახლეობა კრიმინალური ჯგუფების შესაძლო ძალადობრივი პასუხისგან დაეცვა. მან დაამატა, რომ შტატის მასშტაბით კვირას დაგეგმილი ყველა ღონისძიება უქმდებოდა.
პრეზიდენტმა კლაუდია შეინბაუმმა მოსახლეობას სიმშვიდისკენ მოუწოდა და განაცხადა, რომ ბლოკადები უკვე მოხსნილია და „პრაქტიკულად ყველა საქმიანობა აღდგენილია,” თუმცა ეროვნული უსაფრთხოებიდან გამომდინარე, ქვეყნის მასშტაბით კვლავ მუშაობს საკოორდინაციო ცენტრი.
ოსეგუერა სერვანტესი, ცნობილი, როგორც „ელ მენჩო”, მექსიკის ერთ-ერთ ყველაზე სწრაფად მზარდ კრიმინალურ ქსელს მეთაურობდა, რომელიც აშშ-ში ფენტანილის, მეთამფეტამინისა და კოკაინის გატანით, ასევე სახელმწიფო პირებზე თავდასხმებით იყო ცნობილი.
Kali Uchis-ის კონცერტის ორგანიზატორებმა ესპანურ „ბილბორდთან” საუბარში დაადასტურეს, რომ მათი ღონისძიებები, რომლებიც მომავალ დღეებში მეხიკოსა და ქვეყნის სხვა ადგილებშია დაგეგმილი, ძალაში რჩება. მათ შორისაა შაკირას კონცერტები 27 თებერვალსა და პირველ მარტს.
გვადალახარაში კი ამ კვირას მუსიკის საერთაშორისო ბაზრობა და ფესტივალი PortAmérica იმართება. ორგანიზატორების თქმით, მათ დამატებითი ინფორმაცია არ მიუღიათ, შესაბამისად, ღონისძიებების გეგმის მიხედვით გამართვას ელიან. ამ ეტაპისთვის ძალაში რჩება ასევე გვადალახარაში ამ კვირაში დაგეგმილი კონცერტებიც.
