Bad Bunny აგრძელებს მსოფლიო ტურნეს, სახელწოდებით – Debí Tirar Más Fotos, რომლის ფარგლებშიც ცოტა ხნის წინ ბრაზილიას ეწვია. ეს იყო პირველი შემთხვევა, როდესაც არტისტმა ამ ქვეყანაში კონცერტი გამართა.
მომღერალმა კონცერტები 20 და 21 თებერვალს, სან-პაულუში, Allianz Parque-ში ჩაატარა. ბოლო შოუზე პუერტო-რიკოელმა არტისტმა ფანები გააოცა – ის სცენაზე გამოჩნდა ქურთუკით, რომელიც ლეგენდარულ ფეხბურთელს, პელეს, 1966 წლის ინგლისის მსოფლიო ჩემპიონატის დროს ეცვა.
„ეს არის ბრაზილიის დიდი დღესასწაული და აღნიშვნას იმსახურებს ბენიტოს მხრიდან იმის გააზრება, ჩვენი საზოგადოების ჩამოყალიბებისთვის რამდენად მნიშვნელოვანია პელე – შავკანიანი ბრაზილიელი, ლათინოამერიკელი კაცი,“ – განუცხადა Associated Press-ს მაისურების კოლექციონერმა კასიო ბრანდაომ.
ბრანდაომ, რომელიც 7 000-ზე მეტ ისტორიულ საფეხბურთო ნივთსა და მაისურს ფლობს (აქედან 115 უშუალოდ პელეს ეკუთვნოდა), ასევე აღნიშნა, რომ Bad Bunny ნივთს „ძალიან მოუფრთხილდა“ და ის „იდეალურ მდგომარეობაში, იმავე ჩემოდნით დაუბრუნდათ“.
გარდა ამისა, AP იუწყება, რომ არტისტმა სიმღერაში „Monaco“ ტექსტი პელეს პატივისცემის ნიშნად შეცვალა: ნაცვლად ფრაზისა „ეს ჰგავს გოლის გატანას მესისა და მარადონას შემდეგ“, მან იმღერა „ეს ჰგავს გოლის გატანას პელესა და მარადონას შემდეგ“.
Bad Bunny is still making headlines in Brazil days after his concerts in Sao Paulo — this time for paying tribute to soccer legend Pelé. During his second show, the artist born Benito Antonio Martínez Ocasio wore a jacket Pelé used in the 1966 World Cup. pic.twitter.com/lzuVU3wvdt
— The Associated Press (@AP) February 26, 2026
მოგვიანებით, პელეს ოფიციალურმა ინსტაგრამ გვერდმა Bad Bunny-ს ამ ჟესტისთვის მადლობა გადაუხადა: „Bad Bunny-მ დაამტკიცა, რომ ფეხბურთი თავად არის მუსიკა და სიხარული. ბრაზილიაში გამართულ ორ კონცერტზე მან პატივი მიაგო ჩვენს მარადიულ მეფეს. ეს ბევრ რამეზე მეტყველებს – პატივისცემაზე, მემკვიდრეობის დაფასებაზე და იმაზე, თუ როგორ სცდება ფეხბურთი საზღვრებს, ენებსა და თაობებს. მადლობა პატივისცემისთვის, ბენიტო. მუსიკა აკავშირებს ადამიანებს, ისევე, როგორც ფეხბურთი.“
იმავე საღამოს, Bad Bunny-მ სცენაზე პაუზით პატივი მიაგო სალსას ვარკსვლავის, ვილი კოლონის ხსოვნას, რომელიც 21 თებერვალს 75 წლის ასაკში გარდაიცვალა. „დღეს გარდაიცვალა ერთ-ერთი ლეგენდა, რომელმაც წვლილი შეიტანა ამ ლამაზ და ლეგენდარულ ჟანრში,“ – მიმართა Bad Bunny-მ აუდიტორიას.
ტურნე Debí Tirar Más Fotos 28 თებერვალსა და 1 მარტს სიდნეიში გაგრძელდება, 7 მარტს კი ტოკიოში გადაინაცვლებს. ეს ავსტრალიასა და იაპონიაში მომღერლის პირველი გამოსვლა იქნება.
