ერეკლე დეისაძემ არტისტ Sabana-სთან (SabanaYesYes) ერთად ახალი ტრეკი, სახელწოდებით „სადაც გამახედეს“ გამოუშვა. ნამუშევრის პროდაქშენი Sabana-ს ეკუთვნის, ხოლო ტექსტი – ერეკლე დეისაძეს. ტრეკი SabanaYesYes-ის ახალი მუსიკალური პროექტის, ONEONEWORLD-ის ფარგლებში გამოიცა.
ერეკლე დეისაძე:
„ამ ტრეკზე დიდხანს ვმუშაობდით, რადგან გვინდოდა ისეთი რაღაცისთვის მიგვეგნო, რაც ორივე ჩვენგანის ხელწერას და ხასიათს კარგად გამოაჩენდა. ეს ჩვენი პირველი კოლაბორაცია არ არის – Sabana-სთან ადრეც მიმუშავია და მომავალშიც ვაპირებთ საერთო ტრეკების ჩაწერას.“
Sabana:
„ერეკლესთან ბევრჯერ მიმუშავია, თუმცა აქამდე ყველა ტრეკში მისი რეჩიტატივი იყო, ამ ნამუშევარში კი ვოკალური მხარეც ჩანს. ეკოს ძალიან საინტერესო მელოდიური მხარე აქვს და ეგ მინდოდა მეჩვენებინა. სამუშაო პროცესი ცოცხალი და დინამიკური იყო – თავიდან განსხვავებული ინსტრუმენტალი დაიწერა, შემდეგ, როცა ეკომ ტექსტი ჩაწერა და დემო ვერსიას მოვუსმინე, ტრეკიც შესაბამისად ტრანსფორმირდა და დაიხვეწა. სწორედ ამ დემოს მოსმენის შემდეგ დავიჭირე მელოდიურობაც და ამის მიხედვით გავშალეთ ტრეკში.”
სიმღერის ქავერ არტიც სიმბოლიკით არის დატვირთული – მასზე გამოხატულია საქართველოს არქეოლოგიურ ობიექტებზე აღმოჩენილი ცხოველების ფიგურები. ქავერ არტის მთავარი სიმბოლო კი ქართული საბრძოლო იარაღია, რომელიც „საცერული ღაჯიის“ სახელით არის ცნობილი და ვიზუალურად მზის ფორმით გამოისახება.
