Nine Inch Nails-მა და Boys Noize-მა Coachella-ზე გლობალური დებიუტის წინ, რომელიც 11 აპრილს გაიმართება, ერთობლივი ალბომის გამოსვლა დააანონსეს. როგორც ჩანს, ალბომის სახელი ჯგუფის სახელწოდებას გაიმეორებს. პროექტის გამოსვლა კი 17 აპრილს, Coachella-ს ფესტივალიდან ექვსი დღის შემდეგ იგეგმება.
ჯგუფი მომდევნო კვირაში სცენას განმეორებითი გამოსვლისთვისაც დაუბრუნდება. ორივე შოუზე მუსიკა, სავარაუდოდ, ახალი ალომიდანაც შესრულდება.
არტისტების ერთობლივი ჩანაწერის გამოსვლა სულაც არ არის გასაკვირი, რადგან Nine Inch Nails-ის 2025-26 წლების ტურნეს – Peel It Back-ის წარმდგენი არტისტი სწორედ Boys Noize იყო. სამოცდასამდღიან საერთაშორისო ტურნეზე ორივე შემსრულებელი შოუს გარკვეულ ნაწილს ერთადაც ასრულებდა.
ალბომის შესახებ ინფორმაცია არტისტებმა 8 აპრილს სოციალურ ქსელში გააზიარეს. Nine Inch Nails-მა და Boys Noize-მა ალბომის ყდაც გამოაქვეყნეს, სადაც ნარინჯისფერ კვადრატზე წერია: Nine Inch Nails, ხოლო ბოლო N-ის ქვეშ ვერტიკალურად მიწერილია oize.
ტურნე Peel It Back მარტში, კალიფორნიის შტატის ქალაქ საკრამენტოში დასრულდა. სწორედ ამ კონცერტზე ბენდის ფრონტმენმა ტრენტ რეზნორმა ტულსაში გამართულ შოუზე გაკეთებული განცხადება განმარტა. მაშინ გაჩნდა ვარაუდი, რომ ბენდი ტურნეებს აღარ გამართავდა.
გულშემატკივრების მიერ გავრცელებულ YouTube ვიდეოში ტრენტ რეზნორმა აღნიშნა, რომ ეს იყო Peel It Back ტურნეს ბოლო შოუ და დასძინა:
„გასაგებად მინდა განგიმარტოთ. მგონი, რამდენიმე დღის წინ ისეთი რამ ვთქვი, რაც შემდეგ არასწორად იქნა აღქმული. მე ვთქვი, რომ ეს არის ამ ტურნეს ბოლო კონცერტი და არც ამ ეტაპზე და არც ახლო მომავალში არ გვაქვს დაგეგმილი ახალი შოუები.
ეს არ ნიშნავს იმას, რომ შეიძლება აღარასოდეს წავიდეთ ტურნეში. ეს არ მოხდება მომავალ თვეში, არ მოხდება წელს, მაგრამ არასოდეს მითქვამს, რომ ვჩერდებით და ეს არც მიგულისხმია“. – აღნიშნა მან.
