როგორც Billboard-ისთვის გახდა ცნობილი, ბრიტნი სპირსმა სამკურნალო დაწესებულებას ნებაყოფლობით მიაკითხა. პოპვარსკვლავის წარმომადგენელმა 12 აპრილს დაადასტურა, რომ მომღერალმა ცენტრში რეგისტრაცია გაიარა, თუმცა მიზეზი არ დაუკონკრეტებია. ამ ეტაპზე დამატებითი დეტალები სპირსის გუნდს არ გაუსაჯაროებია. TMZ-ის ინფორმაციით კი, მომღერალმა რეაბილიტაცია მავნე ნივთიერებებზე დამოკიდებულების სამკურნალოდ დაიწყო.
სამკურნალო დაწესებულებაში შესვლის გადაწყვეტილება მომღერალმა მას შემდეგ მიიღო, რაც ის სავარაუდოდ ნასვამ მდგომარეობაში ავტომობილის მართვის ბრალდებით დააკავეს. მომღერალი 4 მარტს კალიფორნიაში, ვენტურას ოლქში დააკავეს და პოლიციის განყოფილებაში გადაიყვანეს, თუმცა მეორე დილას, 5 მარტს, პატიმრობიდან გაათავისუფლეს.
„ეს იყო სამწუხარო შემთხვევა, რომელსაც გამართლება არ აქვს. ბრიტნი აპირებს, მართებული ნაბიჯები გადადგას და კანონს დაემორჩილოს. იმედია, ეს იქნება პირველი ნაბიჯი იმ დიდი ხნის დაგვიანებული ცვლილებებისკენ, რომლებიც მის ცხოვრებაში უნდა მოხდეს. ვიმედოვნებთ, რომ ამ რთულ პერიოდში საჭირო დახმარებასა და მხარდაჭერას მიიღებს,” – განაცხადა მომღერლის წარმომადგენელმა დაკავების შემდეგ.
მისივე თქმით, შვილები დროს დედასთან გაატარებენ, ხოლო ახლობლები სპეციალურ გეგმას შეიმუშავებენ, რომელიც მომღერლის კეთილდღეობასა და წარმატებას შეუწყობს ხელს.
მიუხედავად იმისა, რომ თავად ბრიტნი სპირსს მომხდარზე კომენტარი არ გაუკეთებია, 27 მარტს ის ინსტაგრამზე ცეკვის ვიდეოთი დაბრუნდა. ვიდეოში ის თავის 19 წლის შვილთან, ჯეიდენ ფედერლაინთან ერთად ჩანს. პოსტის აღწერაში მან გულშემატკივრებს მხარდაჭერისთვის მადლობა გადაუხადა და აღნიშნა, რომ ოჯახთან და მეგობრებთან დროის გატარება დიდი ბედნიერებაა.
