ჰეილი ბიბერმა 13 აპრილს ინსტაგრამზე კულისებს მიღმა გადაღებული ფოტოსერია გააზიარა, რომელიც ოჯახის საფესტივალო შაბათ-კვირას ასახავდა, მათ შორის კი გამორჩეული დეტალი: მათი 19 თვის ვაჟის, ჯეკ ბლუზ ბიბერის დროებითი ტატუ იყო, წარწერით – Bieberchella.
“ეს განსაკუთრებული უქმეები იყო. ვერავინ ვერასდროს წარმოიდგენს, თუნდაც მცირედით, თუ რა გზა გამოვიარეთ აქამდე მოსასვლელად. მადლიერი ვარ ამ მშვენიერი ცხოვრებისთვის და ძალიან ვამაყობ. მოდით, ეს ყველაფერი თავიდან გავიმეოროთ!“ – დაწერა ჰეილი ბიბერმა გამოქვეყნებულ პოსტში.
ფოტო-კარუსელი ჰეილისა და ჯასტინის საერთო კადრით იწყება, სადაც მომღერალს ხელში პატარა ჯეკი უჭირავს. გამოქვეყნებულ ვიდეოებში ჩანს საუნდჩექის პროცესიც: ერთ ეპიზოდში ჰეილი ჯასტინის სიმღერის, Favorite Girl-ის ფონზე ცეკვავს, სხვა კადრში კი წყვილს პატარა ჯეკი ჰყავს აყვანილი, რომელიც მამის ჰიტის, FIRST PLACE-ის რეპეტიციაზე ცეკვავს.
ფოტოსერია სრულდება კადრით, რომელზეც ბავშვის ხელზე დროებითი ტატუა, წარწერით – Bieberchella.
აღსანიშნავია, რომ 11 აპრილს, ჯასტინ ბიბერის პირველი სოლო ჰედლაინერული გამოსვლისას, ჰეილი მეუღლეს გულშემატკივართა რიგებიდან უსმენდა.
Everything Hallelujah-ს შესრულების დროს, Coachella-ს პირდაპირი ეთერის კამერამ აუდიტორიაში მყოფი ჰეილი დააფიქსირა, როდესაც ჯასტინი შემდეგ სტრიქონს მღეროდა: Hailey, babe, hallelujah. მან სცენაზე მყოფ ჯასტინს ჰაეროვანი კოცნა გაუგზავნა, რასაც მაყურებლის ოვაციები მოჰყვა. ჯასტინმა შემდეგი სტრიქონი შვილს მიუძღვნა, ფრაზით: Baby Jack, hallelujah.
საფესტივალო უქმეები მთელი ოჯახისთვის საკმაოდ დატვირთული აღმოჩნდა. ფესტივალის ტერიტორიაზე ჯასტინის ბრენდმა SKYLRK 10 000 კვადრატული მეტრის ფართობის დასასვენებელი სივრცე – Oasis და მერჩ მაღაზია მოაწყო. პარალელურად კი ჰეილის ბრენდი, Rhode, Coachella-ს ფესტივალზე საკუთარი Rhode World სივრცით დაბრუნდა. აღსანიშნავია, რომ ეს ყველაფერი სულ რამდენიმე დღის წინ ჰეილისა და ჯასტინის კოლაბორაციული ბრენდის მიერ ახალი ჰიდროკოლოიდური აკნეს პლასტირების გამოშვებას მოჰყვა.
მიუხედავად იმისა, რომ ბიბერებს შვილის სახე საჯაროდ ჯერ არ გამოუჩენიათ, 2024 წლის აგვისტოში მისი დაბადების შემდეგ, წყვილი პერიოდულად მაინც აზიარებს ბავშვის შესახებ ფრაგმენტულ კადრებს. პატარა ჯეკი ჯასტინის გრემის ნომინანტი ალბომის, SWAG-ის სარეკლამო ფოტოებშიც ჩანს, რომელიც ფოტოგრაფ რენელ მედრანოს მიერაა გადაღებული.
გასულ ჰელოუინზე ჰეილიმ გამოაქვეყნა ფოტო, სადაც ჯეკს ისეთივე იასამნისფერი ჰუდი და თეთრი ქურთუკი აცვია, როგორითაც ჯასტინი თავის ცნობილ ტურნეში, My World Tour-ში გამოდიოდა. ამ თვის დასაწყისში კი ჰეილიმ კიდევ ერთი ფოტო-კარუსელი გააზიარა, სადაც ჩანს, თუ როგორ ერთობა ჯეკი Rhode-ს აკნეს პაჩებით და როგორ უყურებს ჯასტინის 2011 წლის დოკუმენტურ ფილმს Never Say Never მამის კალთაში.
ჯასტინი Coachella-ს მთავარ სცენაზე მომდევნო უქმეებზეც დაბრუნდება და 18 აპრილს კვლავ მთავარი გამომსვლელი იქნება.
ჯასტინ ბიბერის ორნაწილიანმა ალბომმა Swag გასულ წელს გამოსვლის შემდეგ გრემის ოთხი ნომინაცია მიიღო. ალბომის პირველი ნაწილი 26 ივლისის მონაცემებით Top Streaming Albums-ისა და Streaming Songs-ის ჩარტებში ლიდერობდა. რაც შეეხება Swag II-ს, მან 2025 წლის სექტემბერში გამოსვლისთანავე Hot 100-ის ჩარტში მეორე პოზიციით სადებიუტო აღიარება მოიპოვა.
