მომღერალმა ნინი აირისმა (Nini Iris) მსმენელს დაანონსებული EP-იდან ქართულენოვანი სინგლი, სახელწოდებით „გისმენ“ წარუდგინა. ნინი აირისის თქმით, ეს ნამუშევარი განსაკუთრებულია იმით, რომ მასში არტისტმა საკუთარი კულტურული ფესვები და ტრადიციული მუსიკალური ელემენტები გააერთიანა.
„ეს არის ოცნება, რომელსაც დიდი ხნის განმავლობაში ვატარებდი – დამეწერა სიმღერა, რომლის ფორმირებაზეც ჩემმა კულტურამ და ფესვებმა მოახდინა გავლენა. საბოლოოდ, ეს ოცნება რეალობად იქცა. მადლიერი ვარ იმ არაჩვეულებრივი და ნიჭიერი ადამიანების, რომლებმაც ეს ჩანაფიქრი გააცოცხლეს,” – წერს ნინი აირისი სოციალურ ქსელში.
„გისმენ“ Sano Studio-ში ჩაიწერა. პროდაქშენზე გიორგი სანოძემ და მარი შარმანმა იმუშავეს, ვოკალის პროდაქშენზე – დავით გოგოლაშვილმა, ხოლო მიქსინგსა და მასტერინგზე – ბექა მინაძემ.
ჩანაწერში პერკუსიაზე მერაბ სანოძე უკრავს, ბას-გიტარაზე კი – სანდრო კიკნაძე.
სიმღერას მრავალფეროვან ჟღერადობას სძენს კვარტეტი, რომლის შემადგენლობაშიც არიან: ბეკო გიორგაძე (პირველი ტენორი), გიორგი არჩვაძე (მეორე ტენორი), დავით გოგოლაშვილი (ბარიტონი) და ილია აბრამია (ბანი). სინგლის გარეკანის ფოტო იან ო ჰარას (Ian O’Hara) ეკუთვნის.
ნამუშევარი მუსიკალურ პლატფორმებზე უკვე ხელმისაწვდომია.
Nini Iris ქართველი მუსიკოსია, რომელიც ამჟამად შეერთებულ შტატებში ცხოვრობს. ის არის პირველი ქართველი მომღერალი, რომელმაც ამერიკულ The Voice-ში მიიღო მონაწილეობა და ნახევარფინალშიც მოხვდა.
