The Ivors-ის წლევანდელ დაჯილდოებაზე როსალია წლის კომპოზიტორად დასახელდება. კატალონიაში დაბადებული ავტორ-შემსრულებელი საპატიო ტიტულს 21 მაისს ლონდონში გამართულ ღონისძიებაზე მიიღებს. პრესრელიზის თანახმად, ჯილდო გადაეცემათ “საერთაშირისო კომპოზიტორებს, რომელთა სიმღერებმაც გასული წლის განმავლობაში კულტურული და კომერციული გავლენა იქონიეს დიდ ბრიტანეთზე.” 2025 წელს ამ ნომინაციის გამარჯვებული Killers-ის ბრენდონ ფლაუერსი გახდა.
The Ivors-ის დაჯილდოების ცერემონია პირველად 1956 წელს გაიმართა და მას შემდეგ მუდმივად იზიდავს დიდ ჰიტმეიკერებს, როგორც ადგილობრივი, ასევე საერთაშორისო მასშტაბით, მათ შორის არიან The Beatles, დევიდ ბოუი, ადელი, სტივი უანდერი, ბრიუს სპრინგსტინი, მიკ ჯაგერი, კით რიჩარდსი და სხვები.
2025 წლის ოქტომბერში როსალიამ მეოთხე ალბომი Lux გამოსცა, რომელმაც მეოთხე ადგილი დაიკავა დიდი ბრიტანეთის ალბომების ჩარტში და Billboard 200-ში. ჩანაწერში როსალია სიმღერებს 13 ენაზე ასრულებს, მათ შორის ესპანურად, კატალონიურად, ინგლისურად, ლათინურად, გერმანულად და არაბულად. 2026 წლის BRIT Awards-ზე მან წლის საერთაშორისო არტისტის ჯილდო დაიმსახურა.
The Ivors Academy-ს აღმასრულებელმა დირექტორმა რობერტო ნერიმ განაცხადა: „ვამაყობთ, რომ როსალიას წლის კოპოზიტორის ჯილდოს გადავცემთ. მისი სიმღერები მთელი მსოფლიოს აუდიტორიის გულებს იპყრობს. 13 ენაზე შექმნილი ტექსტებით, როსალიამ გაარღვია ბარიერები და საზღვრები. მოხარული ვარ, რომ მას ახლა უკვე ჩვენი ინდუსტრიაც აღიარებს და ის თავის პირველ Ivor Novello Award-ს მიიღებს. ეს აღიარება კი ასახავს ჩვენს მზარდ გლობალურ ხედვას და პატივს სცემს იმ სიმღერების ავტორებს, რომლებიც მუსიკასა და კულტურას განსაზღვრავენ.”
წლევანდელი ცერემონიის ნომინანტთა შორის არიან: ოლივია დინი, Wolf Alice, ლოლა იანგი და Coldplay.
