მალე გრეისი აბრამსი ახალ სიმღერას, სახელწოდებით Hit the Wall-ს გამოუშვებს. როგორც მომღერალმა სოციალურ ქსელში გამოქვეყნებული პოსტით დააანონსა, ტრეკის რელიზი 14 მაისს იგეგმება.
„ჩემი ახალი სიმღერა ყველგან ხელმისაწვდომი იქნება 14 მაისს. ის მთელი არსებით მიყვარს,” – დაწერა მომღერალმა.
სიახლეს თან ახლავს სინგლის გარეკანიც, რომელზეც მომღერალი ცეცხლის ალის წინ დგას.
სიმღერის დამაანონსებელი პოსტის აღწერას აბრამსმა ინიციალები – „DFH“ დაურთო. ვარაუდობენ, რომ „DFH“ აბრამსის მომავალი ალბომის აბრევიატურაა, რომელიც მისი რიგით მესამე სრული სტუდიური ნამუშევარი იქნება. მისი სადებიუტო ალბომი Good Riddance 2023 წელს გამოვიდა, რასაც 2024 წელს მეორე ალბომი – The Secret of Us მოჰყვა. სწორედ ამ უკანასკნელით აბრამსმა პირველად დაიკავა ადგილი Billboard 200-ის საუკეთესო ათეულში და რეიტინგში მე-2 პოზიციაზე იმყოფებოდა.
გასულ თვეში აბრამსმა რამდენიმე თიზერიც გაავრცელა. მან გამოაქვეყნა ვიდეოს ფრაგმენტი, რომელიც ზუსტად იმ მომენტში წყდებოდა, როდესაც მომღერლის ვოკალი უნდა დაწყებულიყო. აბრამსმა ასევე გამოაქვეყნა ფოტოები სტუდიიდან, სადაც ის პროდიუსერ აარონ დესნერთან ერთად არის, ასევე გავრცელდა ჟურნალის სურათები, რომელსაც ინიციალები – „DFH“ და ციფრი „3“ ეწერა.
„მე და აარონი ერთმანეთს ამ დატვირთულ გრაფიკებს შორის მცირე თავისუფალ დროს ვუთმობთ. ყოველდღე, როცა ამ მუსიკით ვცხოვრობ, ყველაფერი უფრო ნათელი ხდება. ჩვენ მივაგენით რაღაცას, რაც ორივეს ენერგიით გვავსებს,” – აღნიშნა მომღერალმა გასულ წელს Billboard-ისთვის მიცემულ ინტერვიუში.
შეგახსენებთ, რომ მომღერალი 2025 წლის ზაფხულის ბოლომდე Secret of Us Tour-ში იმყოფებოდა.
