ქულიოს 1995 წლის ჰიტმა Gangsta’s Paradise იუთუბზე 2 მილიარდ ნახვას გადააჭარბა. ვიდეოს რეჟისორია ანტუან ფუკა, რომელიც ბოლო დროს ყურადღების ცენტრში მოექცა მაიკლ ჯექსონის ბიოგრაფიული ფილმით „მაიკლი”. ეს რეპერის პირველი კლიპია, რომელმაც ამ შედეგს მიაღწია.
Gangsta’s Paradise გამოყენებულია 1995 წლის ფილმში Dangerous Minds. სიმღერა ქულიოს ამავე სახელწოდების მეორე ალბომის მთავარი და ჩარტებში მისი ყველაზე წარმატებული სინგლია. ის სამი კვირა ლიდერობდა Billboard Hot 100-ში. ალბომმა კი 62 კვირა გაატარა Billboard 200-ში.
1995 წელს Gangsta’s Paradise ლიდერობდა Hot 100-ის წლის შემაჯამებელ ჩარტშიც. 1996 წელს კი სიმღერამ ქულიოს პირველი და ერთადერთი გრემი მოუტანა, ასევე MTV VMA-ს ორი ჯილდო და Billboard Music Award. 2023 წელს „ბილბორდმა” ის ყველა დროის 500 საუკეთესო პოპსიმღერაში შეიყვანა.
1996 წელს სიმღერამ ახალი სიცოცხლე შეიძინა მას შემდგე, რაც „უცნაურმა ელ” იანკოვიჩმა მისი პაროდია Amish Paradise გააკეთა, რომელსაც იუთუბსა და სპოტიფაიზე მილიონობით სტრიმი აქვს. სიმღერა ასევე შესრულებული აქვთ Maneskin-ს, ბრიტანი სნოუსა და Falling in Reverse-ს.
