ქართული ალტერნატიული მუსიკის სცენაზე ერთ-ერთი გამორჩეული ჯგუფი The Cave მსმენელს ახალ სინგლს სთავაზობს. ნამუშევარი, სახელწოდებით WITHANIA SOMNIFERA მუსიკალურ პლატფორმებზე უკვე ხელმისაწვდომია და ის ბენდისთვის დამახასიათებელ ექსპერიმენტულ ჟღერადობასა და ღრმა შინაარსობრივ დატვირთვას აერთიანებს.
ბენდის შემადგენლობაში არიან: საბა ბასიაშვილი – ვოკალი, ლადო სოფრომაძე – ბასი, კახა ასლამაზიშვილი – გიტარა და ნოდო დანდურიშვილი – დრამი. სიმღერის ტექსტი და მუსიკა The Cave-ის დაწერილია, მიქსინგი და მასტერინგი კი ბექა მინაძეს ეკუთვნის.
„WITHANIA SOMNIFERA არის ტრეკი, რომელიც დაკავშირებულია პროცესებთან, თუ როგორ შეიძლება მიხვიდე იმ მდგომარეობამდე, რომ შეძლო რაღაცის შექმნა. წინააღმდეგობაზეა, რომელიც გაძლევს ინსპირაციასა და გადაწყვეტილების მიღების საშუალებას. რიტმული მოტივი ჯაზის სვინგიდან არის წამოსული, რომლის ჟღერადობაც შევუსაბამეთ Cave-ის საუნდს. რიტმული და გაბმული, განმეორებადი მომენტებით, რაც კარგად გამოხატავს ტექსტის შინაარსს თანდართული მაჟორული ირონიით.”
მუსიკალურ ნაწილთან ერთად, არანაკლებ საინტერესოა ვიზუალური მხარეც, რომელიც ტრეკის მთავარ იდეასა და ემოციურ ხაზს გადმოსცემს. კლიპზე ბენდთან ერთად, ახლადშექმნილი ფროდაქშენის, Cherryproduction-ის სახელით ნიკოლოზ ზუბაშვილმა და კატო ზანგურაშვილმა იმუშავეს.
The Cave-ის ახალი ნამუშევარი WITHANIA SOMNIFERA ბენდის ექსპერიმენტულ ხედვასა და ალტერნატიული სცენისადმი განსხვავებულ მიდგომას უსვამს ხაზს.
ცნობისთვის, WITHANIA SOMNIFERA უძველესი მცენარის ლათინური სახელწოდებაა, რომელიც მედიცინასა და კულტურაში სიმშვიდესთან, გამძლეობასთან და ძალების აღდგენასთან ასოცირდება.
სიმბოლურად, ეს სახელწოდება ზუსტად ეხმიანება ტრეკის მთავარ იდეას, რომელიც შემოქმედებითი პროცესის, შინაგანი წინააღმდეგობებისა და ინსპირაციის ძიების თემებს აერთიანებს.
მოისმინეთ The Cave-ის სიმღერა WITHANIA SOMNIFERA:
