პლატფორმა HOLAFILM-მა მარიამ სამუშიასთან კოლაბორაციით მუსიკალური ვიდეო წარადგინა, სახელწოდებით „მწვანე კონცხი”. ვიდეო, რომლის ავტორიც მარიკა ეჯიბიაა, HOLAFILM-ის ახალი პროექტის პირველი ნამუშევარია. პროექტი თავისი კონცეფციით მუსიკალურ ვიდეოებსა და ცოცხალ სესიებს გააერთიანებს, რომელშიც მონაწილეობას სხვადასხვა არტისტი მიიღებს.
„მწვანე კონცხი” მელოდიურადაც და ტექსტითაც მაგიური განწყობის მატარებელი ნამუშევარია. როგორც მარიამ სამუშია და HOLAFILM-ის დამფუძნებელი მარიკა ეჯიბია ამბობენ, კადრში აწყობილი ყველა დეკორაცია ხელით არის შექმნილი, მათ შორის ნავი, მოძრავი ტალღები, მუყაოს ცა და ა.შ. კოსტიუმი, რომელიც გადაღების მნიშვნელოვან ნაწილად იქცა, გიორგი ქებურიას კოლექციიდან არის და ის დიზაინერმა პროექტს უსასყიდლოდ გადასცა.
რაც შეეხება მარიამ სამუშიას, ის ჯგუფ „კოლექტივის” წევრია. არტისტის თქმით, ბენდს ბევრი გეგმა აქვს.
„მალე გამოქვეყნდება ჩვენი ახალი სიმღერა, რომლის ვიზუალიც ანიმატორმა თათა მანაგაძემ შექმნა. 31 მაისს ასევე გვექნება კონცერტი – ვაშლის ბაღების ფესტივალზე საოკუპაციო ხაზთან მცხოვრები ბავშვებისთვის ვიმღერებთ,” – აღნიშნავს მარიამ სამუშია Billboard Georgia-სთან საუბრისას.
