22 მაისს ახალი მუსიკალური აღმოჩენების პლატფორმა Tbilisi Newcomers 2026 წლის სეზონის დაწყებას და საკონკურსო ნამუშევრების მიღებას ოფიციალურად აცხადებს. პროექტი წლებია, ქართული მუსიკალური სცენის განვითარებისა და ახალი ტალღის არტისტების აღმოჩენას ემსახურება და ტრადიციულად, წელსაც საშუალებას აძლევს მუსიკოსებს, საკუთარი შემოქმედება ფართო აუდიტორიას გააცნონ.
გამარჯვებული Newcomer 2026 4 ივლისს Tbilisi Open Air-ის უკვე მე-15 საიუბილეო ფესტივალის მთავარ სცენაზე წარდგება.
ორგანიზატორების განცხადებით, პროექტს არ აქვს ჟანრობრივი შეზღუდვა და მასში მონაწილეობა ნებისმიერ ახალბედა თუ უკვე არსებულ მუსიკალურ პროექტს შეუძლია (ეს იქნება ბენდი, სოლო შემსრულებელი თუ ელექტრონული მუსიკის პროექტი).
აღსანიშნავია, რომ კონკურსი სამ ძირითად ეტაპად წარიმართება და მუსიკოსებს საკუთარი თავის სხვადასხვა ამპლუაში გამოვლენის საშუალებას მიეცემათ:
I ეტაპი აპლიკაციების მიღებაა, რომელიც 22 მაისიდან 7 ივნისამდე (18:00 საათი) გაგრძელდება. მონაწილეობისთვის
აუცილებელია სამი საავტორო ნამუშევრის გაგზავნა. მნიშვნელოვანი პირობაა, რომ წარმოდგენილი ტრეკები ექვს თვეზე მეტი ხნის გამოქვეყნებული არ უნდა იყოს.
II ეტაპი – Showcase (13–14 ივნისი) – უკვე ცოცხალი შესრულებების სივრცეა, სადაც პირველი ტურის შედეგად შერჩეული საუკეთესო პროექტები საკუთარ მუსიკას ჟიურის წინაშე ლაივ ფორმატში შეასრულებენ.
III ეტაპი კი ფინალური კონცერტია, დასკვნითი ღონისძიება, სადაც
წლევანდელი გამარჯვებული გამოვლინდება. (ფინალური ეტაპის თარიღი უახლოეს დღეებში გახდება ცნობილი).
საკონკურსო განაცხადის შევსება მუსიკოსებს 7 ივნისის 18:00 საათამდე ამ ბმულზე შეუძლიათ.
Tbilisi Newcomers-ის ორგანიზატორები მოუწოდებენ ყველა ახალ არტისტს, გამოიყენონ ეს პლატფორმა საკუთარი მუსიკალური კარიერისთვის და გახდნენ ზაფხულის მთავარი მუსიკალური მოვლენის ნაწილი.
