Boards of Canada დაბრუნდა. ალბომით Inferno, რომელიც Warp Records-ზე გამოვიდა, ელექტრონული მუსიკის შოტლანდიურმა დუეტმა 13-წლიანი დუმილი დაასრულა. 2026 წლის კალენდარში ჯგუფის ახალი მუსიკა მხოლოდ ყველაზე ოპტიმისტ ფანებს თუ ექნებოდათ მონიშნული, თუმცა ეს დღე ნამდვილად დადგა. Inferno სწორედ მაშინ გამოვიდა, როცა ევროპა სიცხის ტალღებს ებრძვის და სამყაროც თითქოს იწვის.
ალბომის გამოსვლამდე ინტერნეტში ფოტოები გავრცელდა, სადაც ჩანდა, რომ მისი ვიზუალური გაფორმება 300 არაგველის მემორიალის ფოტოს მოიცავს, რომელიც მთიულეთში მდებარეობს. პროექტის გამოსვლასთან დაკავშირებით კი მსოფლიოს სხვადასხვა წერტილში ალბომის პოსტერები გამოჩნდა, მათ შორის იყო საქართველოც.
18 კომპოზიციისგან შემდგარი ალბომის ხანგრძლივობა 70 წუთია და იწყება მანამდე გამოცემული სინგლებით: Introit და Prophecy At 1420 MHz.
Inferno შესაძლოა მაიკ სენდისონისა და მარკუს იოინის ყველაზე ექსპერიმენტული ნამუშევარი იყოს 2002 წლის Geogaddi-ს შემდეგ. ჩანაწერი მათი სავიზიტო ხელწერით ჟღერს – მასშტაბური, ზოგჯერ ხალისიანი, ეგზოტიკური და მომენტებში – პოსტაპოკალიფსური. თუ დისკო-ჰაუსის მიქსს ეძებთ, მაშინ ეს ალბომი თქვენთვის არ არის.
გამორჩეულ კომპოზიციებს შორისაა You Retreat In Time And Space, რომელიც ზუსტად გადმოსცემს ძველი ბრიტანული კათედრალის ატმოსფეროს, Arena Americanada – ნაცნობი ჟღერადობის კომპოზიცია და Age of Capricorn, რომლის იდუმალი დასემპლილი ვოკალი ფანებს აღმოჩენების სამყაროში ჩაძირავს.
Inferno მოჰყვება დუეტის 2013 წლის ალბომს Tomorrow’s Harvest – ჩანაწერს, რომელიც დიდი ბრიტანეთის ჩარტში მეშვიდე ადგილით შევიდა და მათი პირველი ტოპ ათეულის ალბომი გახდა. პროექტი ასევე შევიდა Billboard 200-ში მე-13 პოზიციაზე, რაც მათი პირველი გამოჩენა იყო აშშ-ის ყველა ჟანრის ალბომების ჩარტში.
Boards of Canada-ს წევრები – სენდისონი და იოინი ძმები არიან – იდუმალი და საკუთარ სამყაროში ჩაკეტილი დუეტი, რომელთაც ელექტრონული მუსიკის მცოდნეები განსაკუთრებულ პატივს სცემენ. ისინი იშვიათად მართავენ ცოცხალ შესრულებებს და თითქმის არასდროს ესაუბრებიან პრესას. როგორც ჩანს, ეს ტენდენცია უახლოეს მომავალშიც არ შეიცვლება.
Inferno ხელმისაწვდომი იქნება ვინილის, CD-ისა და ციფრულ ფორმატებში.
მოუსმინეთ ალბომს:
