კინოკომპანია „პარაშუტ ფილმსი“ კინოთეატრ „ამირანში“ რეჟისორ კოტე კალანდაძის ახალი დოკუმენტური ფილმის, „არავინ არ ჩანს“ ჩვენებებს იწყებს. საქართველოს და საფრანგეთის ერთობლივი ფილმის ნახვა ქართულ ენაზე, ინგლისური სუბტიტრების თანხლებით იქნება შესაძლებელი.
„არავინ არ ჩანს“ სოციალურად აქტუალურ და მტკივნეულ თემას ეხება. დოკუმენტური ფილმის სიუჟეტი მოგვითხრობს ახალგაზრდა მამაკაცის, აჩიკოს შესახებ, რომელიც უკვე ათი წელია, რაც სახელმწიფო ჩანაცვლებითი თერაპიის პროგრამაში მონაწილეობს. ეს პროგრამა მას გარკვეულ ყოველდღიურ რუტინას სთავაზობს, თუმცა საბოლოო გამოჯანმრთელების იმედს თითქმის არ უტოვებს. გაუსაძლისი მარტოობისა და ნარკოდამოკიდებულების მძიმე ტვირთის მიუხედავად, მთავარი გმირი მაინც არ კარგავს იმედს და კვლავ სრულფასოვან, თავისუფალ ცხოვრებაზე ოცნებობს.
ფილმის პრემიერა თბილისის საერთაშორისო კინოფესტივალზე შედგა, სადაც ნამუშევარი ევროკავშირის ადამიანის უფლებების ჯილდოს მფლობელი გახდა.
ფილმის პირველი საჯარო ჩვენება 8 ივნისს, DOCA-ს კინოკლუბის ფარგლებში უკვე ჩატარდა, სადაც დისკუსიას კინომცოდნე და ილიას უნივერსიტეტის პროფესორი თეო ხატიაშვილი უძღვებოდა. შემდეგი კონოსეანსები 13 და 14 ივნისს, 18:00 საათზე გაიმართება. შაბათს, 13 ივნისს, ჩვენების დასრულების შემდეგ გაიმართება შედგება, რომლის მოდერატორიც მსახიობი თინა ლაღიძე იქნება. დისკუსია ასევე დაგეგმილია 14 ივნისის ჩვენების შემდეგ.
კინოჩვენებებზე დასასწრები ბილეთების შესაძენად ეწვიეთ ბმულს.
