ამერიკელი მუსიკოსი და პროდიუსერი Oliver Tree გარდაიცვალა. როგორც ცნობილია, არტისტი ბრაზილიაში, ვერტმფრენის ავიაკატასტროფის შედეგად დაიღუპა. ის იმ ექვს გარდაცვლილს შორისაა, რომლებიც რიო-დე-ჟანეიროს სამხრეთ-დასავლეთ ნაწილში, რეკრეიო დოს ბანდეირანტესში (Recreio dos Bandeirantes), ორი ვერტმფრენის შეჯახებას ემსხვერპლნენ. ავიაკატასტროფა 14 ივნისს მოხდა. აღნიშნული ინფორმაცია რიო-დე-ჟანეიროს სამოქალაქო პოლიციამ უკვე დაადასტურა.
არტისტმა ცოტა ხნის წინ მუსიკალური ვიდეო გამოუშვა, რომელიც საქართველოში, დიდგორის ბრძოლის მონუმენტის ფონზეა გადაღებული. 2024 წელს, მსოფლიო ტურნეს ფარგლებში, Oliver Tree-მ თბილისში კონცერტიც გამართა. ეს საქართველოში მისი პირველი შოუ იყო.
Oliver Tree კალიფორნიელი მომღერალი, სიმღერების ავტორი, პროდიუსერი, რეპერი და რეჟისორია. არტისტმა 2017 წელს, სიმღერა When I’m Down-ის პოპულარობის შემდეგ, კონტრაქტი გააფორმა Atlantic Records-თან, 2020 წლის 17 ივლისს კი სადებიუტო სტუდიური ალბომი Ugly Is Beautiful გამოუშვა. Oliver Tree-მ საერთაშორისო აღიარება მოიპოვა ჰიტებით: Life Goes On (2021) და Miss You (2022). 2022 წლის 18 თებერვალს მან მეორე სტუდიური ალბომი Cowboy Tears წარადგინა, ხოლო 2023 წლის 29 სექტემბერს არტისტის მესამე სტუდიური ნამუშევარი – Alone in a Crowd გამოიცა.
