Quemmekh-მა და რეჟისორმა გურამ მაცხონაშვილმა ახალი პრომო ვიდეო გამოაქვეყნეს. თიზერით კოლაბორაციული პროექტის შესახებ მეტი დეტალი გახდა ცნობილი: პერფორმანსი 25 და 26 სექტემბერს, მულტიფუნქციურ სახელოვნებო სივრცეში – Factory Tbilisi-ში ჩატარდება. გურამ მაცხონაშვილი Quemmekh-ის ლაივშოუს კრეატიული დირექტორია.
თარიღების დაანონსებასთან ერთად დაიწყო ე.წ. პრე-სეილიც – დასასწრები ბილეთების შეძენა უკვე შესაძლებელია ვებგვერდზე: UNBURNED.LIVE.
Quemmekh და გურამ მაცხონაშვილი ერთობლივ პროექტზე ბოლო ერთი თვის განმავლობაში სოციალურ ქსელში გამოქვეყნებული მასალებით მიანიშნებდნენ. ყველაფერი მაშინ დაიწყო, როცა არტისტების ინსტაგრამ გვერდებიდან ყველა პოსტი წაიშალა და მხოლოდ კოლაბორაციული პოსტერი გამოქვეყნდა, სადაც თეთრ ფონზე იყო წარწერა: „Project: U”.
ლაივშოუს კამპანიას სერიული სახე აქვს – უახლესი ვიდეოც წინა ვიდეოს გაგრძელებაა და მასშიც რუსუდან აბაშიძე მონაწილეობს, რომელსაც პარტნიორობას გივიკო ბარათაშვილი უწევს.
პროექტის შესახებ სრული აღწერილობა ჯერ კიდევ არ გამოქვეყნებულა, თუმცა სავარაუდოა, რომ პერფორმანსით Quemmekh და გურამ მაცხონაშვილი აუდიტორიას მუსიკალური და თეატრალური მედიუმების სინთეზს წარუდგენენ.
Quemmekh-სა და გურამ მაცხონაშვილს სამწლიანი შემოქმედებითი პაუზა ჰქონდათ. შესაბამისად, შეგვიძლია მივიჩნიოთ, რომ ამ პროექტით არტისტები სახელოვნებო სცენას უბრუნდებიან.
