ემინემი Julien’s Auctions-თან გაერთიანდა, რათა თავისი პირადი კოლექციიდან 117 წყვილი სპორტული ფეხსაცმელი აუქციონზე გაყიდოს. შემოსული თანხა სრულად მარშალ მეთერსის ფონდს მოხმარდება.
აუქციონზე ფსონების მიღება უკვე დაწყებულია. ფეხსაცმლის ყველა წყვილს დატანილი აქვს Slim Shady-ს ავტოგრაფი. აუქციონის ექსკლუზიური ლოტები კი მოიცავს Air Jordans-ის იშვიათ ფეხსაცმელებს, როგორებიცაა ემინემის 2015 წლის კოლაბორაცია „კარჰარტთან” და Air Jordan 4 Encore.
Air Jordan 3 „Slim Shady“ PE-ზე, რომელიც რეპერს 2022 წლის Super Bowl Halftime Show-ზე ეცვა, მიმდინარე შეთავაზება უკვე 8 000 დოლარს აღწევს. აუქციონის ორგანიზატორები ვარაუდობენ, რომ საბოლოო თანხა 25 000 დოლარს გადააჭარბებს.
კოლექცია მოიცავს Nike Air Max 90 მოდელსაც, რომელიც ემინემს 2024 წლის Soundstorm Festival-ზე ეცვა, ასევე „ადიდასის”, „ნაიკისა” და „პუმას” სპორტულ ფეხსაცმელებს.
აუქციონიდან შემოსული თანხა სრულად მოხმარდება მარშალ მეთერსის ფონდს, რომელიც, როგორც ვებგვერდზე ვკითხულობთ, დეტროიტსა და მის შემოგარენში მცხოვრებ სოციალურად დაუცველ და რისკის ქვეშ მყოფ ახალგაზრდებს ეხმარება.
Julien’s Auctions-ის განცხადებით, ეს ემინემის კარიერაში მისი პირადი ნივთების ყველაზე მასშტაბური ერთჯერადი აუქციონია. ფსონების მიღება გაგრძელდება აუქციონის დაწყებამდე, რომელიც 25 აგვისტოს გაიმართება.
ივლისის დასაწყისში ემინემს იშვიათი საჯარო გამოჩენა ჰქონდა, როცა ჯეი-ზის ნიუ-იორკში გამართული სამი კონცერტიდან მეორეზე შეუერთდა. რეპერებმა მათი ერთობლივი სიმღერა Renegade შეასრულეს ჯეი-ზის ალბომიდან The Blueprint. მოგვიანებით ემინემმა თავისი ჰიმნად ქცეული ჰიტი Lose Yourself-იც შეასრულა.
ემინემის ბოლო ალბომი The Death of Slim Shady (Coup de Grâce) 2024 წელს გამოვიდა. ჩანაწერი Billboard 200-ის ლიდერი გახდა.
ნახეთ Julien’s Auctions-ის ვიდეო ემინემის აუქციონის შესახებ:
