ტომ მორელოსთვის Date Night (პაემნის საღამო) ვახშამსა და ფილმის ყურებას არ ნიშნავს. 28 ივლისს როკერმა ახალი სიმღერა გამოსცა, რომელიც პატივს მიაგებს სამ ახალგაზრდა ქალს, რომლებმაც მეორე მსოფლიო ომის დროს ნაცისტები სასიკვდილო ხაფანგში შეიტყუეს. ეს ერთ-ერთია იმ ანტიფაშისტური სიმღერებიდან, რომლებიც მუსიკოსის ახლადდაანონსებულ ალბომში Everyone Gets Everything They Want შევა.
Date Night, რომელშიც მორელოს თინეიჯერი ვაჟის, რომანის გიტარის პარტია ჟღერს, შექმნილია დები ოვერსტეგენების პერსპექტივიდან. თინეიჯერობის დროს გოგონები მეგობარ ჰანი შაფტთან ერთად, მუშაობდნენ, რათა ნაცისტი ოფიცრები შეეცდინათ და საბოლოოდ ტყეში დაეხოცათ. ისინი ასევე იპარავდნენ იარაღებს, აწყობდნენ სარკინიგზო საბოტაჟს და ებრაელ ბავშვებს ტყვეობის თავიდან აცილებაში ეხმარებოდნენ.
მორელომ გაამხილა ისიც, რომ მისი მომდევნო ალბომი 25 სექტემბერს გამოვა. ჩანაწერში შევა Date Night და ასევე მანამდე გამოცემული სიმღერები: Adjourn It, Everything Burns, Pretend You Remember Me და Soldier in the Army of Love.
„მე ვქმნი ანტირასისტულ სიმღერებს ანტირასისტებისთვის,” – აღნიშნა პოლიტიკურად აქტიურმა მუსიკოსმა განცხადებაში. „მე ვქმნი ანტიფაშისტურ სიმღერებს ანტიფაშისტებისთვის. და ვქმნი ანტინაცისტურ სიმღერებს ანტინაცისტებისთვის. Date Night პირდაპირ იმაზეა, თუ რომელ მხარეს დგახარ. და თუ რომელიმე მათგანი თავს შეურაცხყოფილად გაგრძნობინებთ, დასკვნები თავად გამოიტანეთ.”
Everyone Gets Everything They Want მორელოს პირველი სრულმასშტაბიანი როკალბომი იქნება სოლო არტისტის სტატუსით. მანამდე მას ალბომები The Nightwatchman-ის ფსევდონიმით აქვს გამოცემული, რომელთაგანაც სამი Billboard 200-ში მოხვდა. როგორც Rage-ის წევრი, გიტარისტი შვიდჯერაა შესული აღნიშნულ ჩარტში, მათ შორის ორჯერ პირველ პოზიციაზე, ალბომებით: Evil Empire (1996) და The Battle of Los Angeles (1999).
მომავალი პროექტის ხუთ სიმღერაში მუსიკოსის ვაჟი რომანი თანაავტორადაა მოხსენიებული. ალბომში ასევე მონაწილეობენ სერჟ ტანკიანი და Kneecap.
მოუსმინეთ Date Night-ს:
