31 აგვისტოს ცნობილი გახდა, რომ ბიონსემ ინდიანას შტატში წყალდიდობით დაზარალებულთა დასახმარებლად ასობით ათასი დოლარი გამოყო.
ვარსკვლავის საქველმოქმედო ფონდმა, სახელწოდებით – BeyGood ეს სიახლე სოციალურ ქსელში გამოქვეყნებული პოსტით გაავრცელა. პოსტიდან ირკვევა, რომ ფონდმა 200 000 დოლარის ოდენობის დახმარება გადარიცხა ორგანიზაციებში: City Life Center და Angel by Nature. ეს ორი ორგანიზაცია ეხმარება იმ თემებს, რომლებიც ყველაზე მეტად დაზარალდნენ შტორმის მიერ გამოწვეული წყალდიდობის შედეგად. წყალდიდობამ გაანადგურა ინფრასტრუქტურა და 1000-ზე მეტი ადამიანი უსახლკაროდ დატოვა.
„ფონდი დაუყოვნებლივ დააფინანსებს გადაუდებელ დახმარებასა და აღდგენით სამუშაოებს ყველაზე მძიმედ დაზიანებულ წერტილებში, მათ შორის ქალაქ გარიში და უზრუნველყოფს წყალდიდობით დაზარალებულ პირებსა და ოჯახებს საკვებით, საყოფაცხოვრებო ნივთებითა და სხვა პირველადი მოხმარების რესურსებით,” – აღნიშნულია პოსტში.
პოსტი ასევე მოუწოდებდა გამომწერებს, სურვილის შემთხვევაში, გაეღოთ დონაცია ონლაინ, BeyGood-ის ვებგვერდის მეშვეობით.
ბიონსემ ეს დონაცია გაიღო მას შემდეგ, რაც დონალდ ტრამპის ადმინისტრაციამ 25 აგვისტოს ინდიანაში შექმნილი ვითარება მასშტაბურ კატასტროფად გამოაცხადა. ამ ამბამდე ორი კვირით ადრე ფართომასშტაბიანმა, ხანგრძლივმა ქარიშხალმა გადაუარა ჩრდილო-დასავლეთ და ჩრდილო-ცენტრალურ ინდიანას, რასაც თან ახლდა ტორნადო, სეტყვა და წყალდიდობა.
ინდიანას შიდა უსაფრთხოების დეპარტამენტის ცნობით, ამ სტიქიას შტატის მასშტაბით მოჰყვა ელექტროენერგიის მასობრივი გათიშვა და მოსახლეობის ევაკუაცია.
ბიონსემ ბოლო ალბომი – Cowboy Carter 2024 წელს გამოსცა. ჩანაწერი ორი კვირის განმავლობაში ლიდერობდა Billboard 200-ის ჩარტში. არტისტი ბოლო დროს განსაკუთრებული ქველმოქმედებით გამოირჩევა. აგვისტოს ბოლოს Parkwood Entertainment-მა გააზიარა ინფორმაცია იმის შესახებ, რომ მან 1 მილიონი დოლარი გაიღო კოლუმბიაში კატასტროფის შედეგებთან გასამკლავებლად. ახლახან კოლუმბიაში მომხდარმა 7.4 მაგნიტუდის მიწისძვრამ ფართომასშტაბიანი ნგრევა და საკვების დეფიციტი გამოიწვია.
