მაილი საირუსმა მეათე სტუდიური ალბომი Bass Persuades დააანონსა და Hollywood Bowl-ზე ორი გამორჩეული კონცერტიც დაგეგმა. ამის შესახებ მაილიმ მას შემდეგ განაცხადა, რაც რამდენიმე დღის განმავლობაში ახალი მუსიკალური ეპოქის შესახებ მინიშნებებს ავრცელებდა.
პოპვარსკვლავმა სიახლე 1 სექტემბერს ინსტაგრამზე გააზიარა, სადაც ალბომის ყდა და გამოცემის თარიღიც გაამჟღავნა – 18 სექტემბერი. შავ-თეთრ ფოტოზე მაილი საირუსის პორტრეტია აღბჭდილი.
„მუსიკა გვიპყრობს. ჩვენ მას ვგრძნობთ, ვმღერით, ხანდახან ვცეკვავთ კიდეც, შემდეგ კი ვუშვებთ და გზას ვაგრძელებთ. ის ძლიერი, სათუთი, ტკბილი და ამავდროულად მტკიცეა.” – წერს მომღერალი პოსტში.
„სიხარული, გულისტკივილი და ცხოვრების ყველა განცდა, რაც მათ შორისაა – აი, რას ნიშნავს ეს სათაური ჩემთვის. გმადლობთ, რომ მონაწილეობთ ჩემი ყველაზე გიჟური ოცნებების ასრულებაში. გულწრფელად ვიმედოვნებ, რომ ეს ალბომი შეგიყვარდებათ.“ – განაგრძო მან.
ვარსკვლავმა ინსტაგრამზე ვიდეოც გამოაქვეყნა, სადაც თეთრ კომბინიზონში გამოწყობილი ელექტროგიტარაზე უკრავს. ვიდეოს ფონად მძიმე, აგრესიული ინსტრუმენტალი გასდევს, რომელიც, სავარაუდოდ, Bass Persuades-ის ერთ-ერთი კომპოზიციაა.
გრემის მფლობელ მომღერალს გულშემატკივრებისთვის ახალი ალბომის გარდა კიდევ ერთი სიახლე აქვს. Bass Persuades-ის დაანონსებიდან რამდენიმე წუთში, საირუსმა, რომელსაც წლებია, ტურნე არ ჰქონია და იშვიათად მართავს კონცერტებს დიდ მოედნებზე ინსტაგრამზე ფანებს აცნობა, რომ ოქტომბერში, ახალი პროექტის აღსანიშნავად, Hollywood Bowl-ზე ორდღიან კონცერტს გეგმავს.
„დიდი ხანი გავიდა,“ – დაწერა მან და აღნიშნა, რომ ლოს-ანჯელესის ეს საკონცერტო სივრცე მისი „საყვარელი ადგილია მუსიკის მოსასმენად და საყვარელი შემსრულებლების სანახავად“.
„არაერთხელ ვმჯდარვარ ამ დარბაზში, თუმცა ამ სცენაზე არასდროს ვმდგარვარ, ლოს-ანჯელესი ჩემი გულია და ახლა სახლში ვბრუნდები. იქ შევხვდებით.“ – დასძინა საირუსმა.
Hollywood Bowl-ზე 16 და 18 ოქტომბერს დაგეგმილი კონცერტების ბილეთების წინასწარი გაყიდვა თავდაპირველად 8 სექტემბერს, American Express-ის ბარათის მფლობელებისთვის იქნება ხელმისაწვდომი. შემდეგ ბილეთების შეძენა არტისტისა და Spotify-ის წინასწარი გაყიდვების ფარგლებში იქნება შესაძლებელი, ხოლო დარჩენილი ბილეთები 10 სექტემბრიდან ყველასთვის გახდება ხელმისაწვდომი.
სამწუხაროდ, კამპანიის დაწყებას მაილი საირუსის ნათლიისა და მუსიკალური სამყაროს ლეგენდის, დოლი პარტონის გარდაცვალება დაემთხვა.
„დოლის დაკარგვით გამოწვეული განცდა იმაზე მეტია, ვიდრე ამის საჯაროდ გაზიარება მიმაჩნია სწორად. ჩვენი ყველაზე ძვიფრასი მომენტები ძალიან პირადული იყო და ეს ასეც დარჩება – ყოველგვარი ბრწყინვალების მიღმა, ჩვენს გულებს შორის, ახლა გვერდით ანგელოზი მყავს.“ – დაწერა ინსტგრამზე მაილი საირუსმა პარტონის გარდაცვალების შემდეგ.
ნახეთ მაილი საირუსის ინსტაგრამ პოსტები:
