წინანდლის ფესტივალი 3 სექტემბერს გაიხსნა და თერთმეტი დღის განმავლობაში მუსიკის მოყვარულებს მრავალფეროვან პროგრამას 23 დაუვიწყარი კონცერტით სთავაზობს. ფესტივალის დასკვნითი ღონისძიება (Afterparty) კი სწორედ ვინსენ გარსიას საღამო იქნება.
ვალენსიაში დაბადებული და მუსიკალურ ოჯახში გაზრდილი ვინსენ გარსია გამორჩეული გრუვით, ენერგიული შესრულებითა და თანამედროვე ჟღერადობით თანამედროვე ჯაზისა და ფანკის საერთაშორისო სცენის ერთ-ერთ ყველაზე საინტერესო ბასისტად მიიჩნევა.
ვინსენ გარსია მუსიკალურ პლატფორმებზე ერთ-ერთი ყველაზე პოპულარული ბასისტია. მისი შემოქმედება მილიონობით სტრიმს მოიცავს, ხოლო სოციალურ ქსელებსა და ციფრულ პლატფორმებზე ასიათასობით გამომწერი ჰყავს. კარიერის განმავლობაში მუსიკოსს მონაწილეობა აქვს მიღებული ისეთ პრესტიჟულ ფესტივალებში, როგორებიცაა Montreux Jazz Festival შვეიცარიაში, North Sea Jazz Festival ნიდერლანდებში და Pori Jazz Festival ფინეთში.
ვინსენ გარსიას საერთაშორისო კარიერაში მნიშვნელოვანი ადგილი უჭირავს კოლაბორაციებსაც. მას უმუშავია ისეთ ცნობილ არტისტებთან, როგორებიც არიან Cory Wong და Jesús Molina, მათთან ერთად კი სხვადასხვა საერთაშორისო ტურნეშიც მონაწილეობდა.
მუსიკოსის სადებიუტო ალბომმა Ventura საერთაშორისო ყურადღება და დადებითი შეფასებები დაიმსახურა. 2026 წლის იანვარში გარსიამ მეორე სტუდიური ალბომი, Vivace წარადგინა, რის შემდეგაც მსოფლიო ტურნე დაიწყო, რომელიც სხვადასხვა კონტინენტზე გამოსვლებს მოიცავს.
ვინსენ გარსია ქართველი მსმენელისთვისაც უკვე ნაცნობი სახელია. 27 და 28 მარტს მან Tatuza Jazz Club-ის სცენაზე ორდღიანი შოუ გამართა, სადაც მსმენელს თანამედროვე ჯაზისა და ფანკის სინთეზი, ენერგიული შესრულება და მისთვის დამახასიათებელი უნიკალური ჟღერადობა შესთავაზა.
საქართველოში ვიზიტისას გარსიამ Billboard Georgia-სთან ინტერვიუში თბილისის აუდიტორიაზეც ისაუბრა და ხაზი გაუსვა იმ განსაკუთრებულ კავშირს, რომელიც მუსიკოსსა და მსმენელს შორის პერფორმანსის დროს იქმნება.
„თავიდან ხალხი ზის, სივრცეს აკვირდება… თუმცა შოუს შუა ნაწილიდან ტემპი ყოველთვის მატულობს. ჩვენი მუსიკა ჯაზია, მაგრამ მასში ბევრი ფანკი, ფიუჟენი და როკის ელემენტებიცაა. საბოლოოდ, ხალხი ფეხზე დგება და საღამო ენერგიულ შოუდ იქცევა“, – ამბობდა მუსიკოსი.
13 სექტემბერს ვინსენ გარსია წინანდლის ფესტივალის Afterparty-ზე წარდგება და ფესტივალს მისთვის დამახასიათებელი ენერგიული შესრულებითა და თანამედროვე ჯაზისა და ფანკის გამორჩეული სინთეზით დახურავს.
წინანდლის ფესტივალის წარმდგენია კომპანია სილქნეტი.
ბილეთების შეძენა კი tkt.ge-ის ბმულზეა შესაძლებელი.
