ირაკლი ჭოლაძის კვარტეტის ახალი ალბომი  – NU

NU ირაკლი ჭოლაძის საავტორო კომპოზიციებს აერთიანებს, სადაც არტისტი გარემოსადმი საკუთარ დამოკიდებულებას მუსიკით გადმოსცემს.
Irakli Choladze Quartet - Nu ფოტო: ნატა გზირიშვილი
Irakli Choladze Quartet – Nu
ფოტო: ნატა გზირიშვილი

გარემო ფაქტორებს და საზოგადოების წინაშე არსებულ გამოწვევებს მუსიკოსების შინაგან სამყაროზე არაერთხელ მოუხდენია  პირდაპირი თუ ირიბი გავლენა. როგორც მუსიკოსი ირაკლი ჭოლაძე აღნიშნავს,  გარეგანმა წნეხმა ორგვარი რეაქცია შეიძლება გამოიწვიოს – ან დათრგუნოს შინაგანი ხმა, ან მიმართოს ის ძლიერი  პროტესტისკენ. სწორედ წინააღმდეგობრივი იმპულსიდან დაიბადა ქართული ჯაზის სცენის ახალი პროექტი, სახელწოდებით NU. 

ირაკლი ჭოლაძის კვარტეტის ახალი ალბომი 22 ოქტომბერს ექსკლუზიურად Bandcamp-ზე გამოქვეყნდა. ნამუშევარი ოთხი მუსიკოსის თანამშრომლობის შედეგია და თანამედროვე ქართულ მუსიკაში ახალ, ექსპერიმენტულ ხმოვან გამოცდილებას ქმნის.

ალბომის შექმნის იდეა ირაკლი ჭოლაძეს 2025 წლის სექტემბერში გაუჩნდა. პროექტში გაერთიანებულია სხვადასხვა მუსიკალური მიმართულება: როკი, ჯაზი, პროგრესული როკი, ფიუჟენი, თავისუფალი იმპროვიზაცია და ექსპერიმენტული ელექტრონიკა.

„ბოლო რამდენიმე წელია, ჩვენი ქვეყანა (და არა მხოლოდ ჩვენი) აბსოლუტურ სისტემურ და მორალურ დეფორმაციას განიცდის. ასეთ დროს შინაგანი სიმშვიდისა და ფსიქიკური ბალანსის შენარჩუნება ძალიან რთულია. ჩემი დაკვირვებით, ასეთი მდგომარეობა იწვევს ორიდან ერთს: ან სრულ შემოქმედებით „კოლაფსს“, ან პირიქით, ინდივიდუალური პროტესტის გამოხატვის უდიდეს სურვილს. „NU“ ამ მეორე იმპულსიდან დაიბადა“, –  ამბობს მუსიკოსი.

მისი თქმით, ალბომი მუდმივი შემოქმედებითი ძიების გაგრძელებაა. ამასთან, NU მხოლოდ მუსიკალური ექსპერიმენტი არ არის: ესაა რეაქცია და პასუხი, რომელიც სიტყვების გარეშეც გამოითქმის.

„NU ჩემთვის მუდმივი ძიების გაგრძელებაა: სტილების შერწყმა, ახალი მუსიკალური ტექნიკის, ტექსტურებისა და „დიალექტების“ აღმოჩენა. წლების განმავლობაში ვუკრავდი როკს, ჯაზს, პროგრესულ როკს, ფიუჟენს, თავისუფალ იმპროვიზაციულ მუსიკასა და ექსპერიმენტულ ელექტრონიკას. ამ პროექტში ყველაფერი ეს საავტორო კომპოზიციებში ერთიანდება. ეს არის მუსიკა, რომელიც გარემოსადმი შინაგან პასუხს და პროტესტს გამოხატავს. ამავე დროს, ის ცდილობს, სიტყვების გარეშე, ხმით თქვას ის, რისი თქმაც ახლა ყველაზე მეტად გვჭირდება.”

ალბომში ირაკლი ჭოლაძის კომპოზიციებს კვარტეტის წევრები საკუთარი მუსიკალური ხედვით ავითარებენ. შემადგენლობაში არიან ლაშა საყვარელიძე (ალტო საქსოფონი), საბა ოკუჯავა (კლავიშიანი საკრავები), გიგი ცინცაძე (ელექტროგიტარა) და თავად ირაკლი ჭოლაძე (დრამსეტი).

კვარტეტის სადებიუტო კონცერტი 2025 წლის 8 ნოემბერს გაიმართა, ალბომზე მუშაობა კი 2026 წლის 6 აპრილს დასრულდა. ჩაწერის თითოეული ეტაპი ვიდეოზეა ასახული. NU-ს გამოქვეყნების პარალელურად, 22 ოქტომბერს, მუსიკოსებმა ალბომის პრეზენტაცია ჯაზკლუბ „თათუზაში“ გამართეს.

ირაკლი ჭოლაძის თქმით, ალბომის შექმნის პროცესში მისთვის ოჯახის მხარდაჭერა განსაკუთრებულად მნიშვნელოვანი იყო: „ამ ყველაფრის გავლას ჩემი ოჯახის – მეუღლის, ნატასა და ჩვენი შვილის, ლუმის გარეშე ვერ შევძლებდი. ისინი იყვნენ ჩემი შთაგონება და მთელი პროცესის განმავლობაში გვერდში მედგნენ“. 

ალბომის ხმის რეჟისორი მურკა ლალუაშვილია, მიქსი ირაკლი ჭოლაძეს ეკუთვნის, მასტერინგი – ილია მაზაევს, ფოტოსა და გარეკანის ავტორი კი ნატა გზირიშვილია. ვიდეოგადაღებაზე გიორგი ნიკოლაიშვილმა, ალექსანდრე შუღლაძემ და ნიკოლოზ აგლაძემ იმუშავეს, მონტაჟი კი გიორგი ნიკოლაიშვილს ეკუთვნის.

მოუსმინეთ ირაკლი ჭოლაძის კვარტეტის ახალ ალბომს NU Bandcamp-ზე. ჩაწერის პროცესის სრული ვიდეო ხელმისაწვდომია YouTube-ზე.

Share
Tweet
Share
Share
Share

Leave a Reply

წინა სტატია

Ecco2k – Aldehydes and Ketones

თითქმის ხუთწლიანი პაუზის შემდეგ, შვედური ალტერნატიული სცენის ვარსკვლავი Ecco2k ახალი სინგლით – Aldehydes & Ketones ბრუნდება

შემდეგი სტატია

Naré - BOO! - საბავშვო ევროვიზია 2026 -ის გამარჯვებული

საბავშვო ევროვიზიის გამარჯვებული სომხეთი გახდა

შეიძლება დაგაინტერესოთ

The Weeknd - Hong Kong Evan Larsen/YouTube

The Weeknd-მა სიმღერისთვის Hong Kong  შთამბეჭდავი ვიდეოკლიპი გამოუშვა

ვიდეოში აბელი (The Weeknd) კარაოკეს მღერის და ჰონგ-კონგის ქუჩებში საკუთარ ფიქრებში ჩაძირული სეირნობს. კლიპში Cantopop-ის ლეგენდა ფეი ვონგი და ჩინელი სუპერმოდელი მინგ სი მონაწილეობენ.
მეტი
Red Bull Turn It Up - Tropic Ananana

Tropic Ananana – მუსიკა, იმპროვიზაცია და ბევრი გართობა Red Bull Turn It Up-ზე

„ჩემგან მხოლოდ ერთ რამეს უნდა ელოდოთ - ბევრ გართობას, ნაცნობ, საყვარელ მუსიკას და დასამახსოვრებელ საღამოს! მინდა, ყველამ მაქსიმალურად ისიამოვნოს ამ პროცესით. ზედმეტი სერიოზულობის გარეშე - Let's have fun“ - Tropic Ananana
მეტი

2027 წლის გრემის ნომინაციების საბოლოო პროგნოზი: წლის ჩანაწერი და წლის სიმღერა

რეკორდული წარმატების მქონე ჰიტს ორივე ჯილდოს მოპოვება შეუძლია, თუ მის უზარმაზარ პოპულარობას საპასუხოდ კრიტიკის ტალღა არ მოჰყვა.
მეტი
ნოელ და ლიამ გალაგერები ფილმის - Oasis: Don’t Look Back in Anger-ის პრემიერა, ვენეციის 83-ე საერთაშორისო კინოფესტივალი, 2026 წლის 5 სექტემბერი, ვენეცია Earl Gibson III/Deadline

როგორც ჩანს, Oasis როკ-ენ-როლის დიდების დარბაზში შეყვანის ცერემონიას არ დაესწრება

ნოელ გალაგერს ლონდონში კონცერტი აქვს დაგეგმილი, ლიამ გალაგერის თქმით კი, საშობაო პერიოდთან სიახლოვის გამო მოგზაურობა არ სურს.
მეტი

Red Bull Turn It Up პირველად საქართველოში – მუსიკალური შეჯიბრება 14 ნოემბერს გაიმართება

Red Bull Turn It Up-ის ღონისძიება ბეთლის ფორმატში ჩატარდება, გამარჯვებული კი 2027 წელს დუბლინში დაგეგმილ მსოფლიო ფინალში მიიღებს მონაწილეობას.
მეტი