კეროლ ჯი მთავარი ტრიუმფატორი გახდა „ბილბორდის” 2024 წლის ლათინური მუსიკის დაჯილდოებაზე. მუსიკოსმა რვა ჯილდო დაიმსახურა, მათ შორის Global 200-ის წლის ლათინო არტისტისა და წლის ტურნეს ნომინაციებში. ხოლო მისმა სიმღერამ Qlona, რომელსაც ის Peso Pluma-სთან ერთად ასრულებს, წლის ყველაზე ცხელი ლათინური სიმღერის, ასევე ვოკალური შესრულებისა და წლის სტრიმინგ სიმღერის კატეგორიები მოიგო.
ექვსი ჯილდო დაიმსახურა Bad Bunny-მ, მათ შორის არის წლის არტისტის წოდება. მისი ალბომი Nadie Sabe lo que Va a Pasar Mañana წლის ტოპ ლათინურ ალბომად და საუკეთესო ლათინურ რიტმულ ალბომად დასახელდა. მისმა სიმღერამ Mónaco კი წლის ყველაზე გაყიდვადი სიმღერის ნომინაცია მოიგო.
ასევე 6 ნომინაციაში გაიმარჯვა Peso Pluma-მაც. კეროლ ჯისთან ერთად მოგებული კატეგორიების გარდა, მას ერგო ცხელი ლათინური სიმღერების მამაკაცი არტისტის, წლის მექსიკელი სოლო არტისტისა და წლის კომპოზიტორის ტიტულები.
სამი მთავარი გამარჯვებულიდან დაჯილდოების ცერემონიას არც ერთი არ ესწრებოდა. დარბაზში იმყოფებოდა მექსიკური ბენდი Fuerza Regida, რომელმაც ოთხი ჯილდო დაიმსახურა. „მადლობა იმისთვის, რომ მუდამ მხარს გვიჭერთ,” – აღნიშნეს ჯგუფის წევრებმა სამადლობელ სიტყვაში.
დაჯილდოებას ასევე ესწრებოდა ხავი, რომელსაც წლის ახალი არტისტის ჯილდო გადაეცა. „ვერ ვიჯერებ. აღტაცებული ვიყავი, როცა ამირჩიეს და ძალიან მადლიერი ვარ ყველასი, ვინც მხარს გვიჭერდა და დასაწყისიდანვე სჯეროდა ჩვენი,” – თქვა ახალგაზრდა მექსიკელმა ვარსკვლავმა.
„ბილბორდის” ყოველწლიური დაჯილდოების 31-ე ცერემონიას კარმენ ვილიალობოსი და დანილო კარერა უძღვებოდნენ. ღონისძიება „ტელემუნდოს” ეთერით გადაიცემოდა. დაჯილდოება ლუის ალფონსოს გამოსვლით გაიხსნა, რომელმაც ჰიტები Tequila con Cerveza და Chismofilia შეასრულა.
„ბილბორდის” ლათინური მუსიკის დაჯილდოება ერთადერთია, რომელიც პატივს მიაგებს ლათინური მუსიკის ყველაზე პოპულარულ არტისტებს, ალბომებს, სიმღერებსა და გამოსვლებს, „ბილბორდის” ყოველკვირეული ჩარტების საფუძველზე. წლევანდელი დაჯილდოება მოიცავს 49 ნომინაციას სხვადასხვა ჟანრში, დაწყებული ლათინური პოპითა და ლათინური რიტმით, დასრულებული რეგიონული მექსიკური კატეგორიით.
ნომინაციებისა და გამარჯვებულების სრული სია იხილეთ ბმულზე.
