საქართველოს მუსიკოსთა კავშირი სოციალურ ქსელში მორიგ განცხადებას აქვეყნებს, რომელსაც უცვლელად გთავაზობთ:
„საქართველოს მუსიკოსთა პროფესიული კავშირის რეკომენდაცია.
მუსიკის სფეროს წარმომადგენლები ვიყავით ერთ-ერთი პირველი სფერო, რომელმაც ქვეყნის მიმდინარე რთული და დაძაბული პოლიტიკური პროცესები გაფიცვის ფორმით გამოხატა.
აღნიშნულით გვინდოდა საზოგადოების განწყობის, სოლიდარობისა და სამოქალაქო პასუხისმგებლობის მაღალი სტანდარტის ჩვენება.
სამი კვირის განმავლობაში გაფიცვა იყო ჩვენი პოზიციის მკაფიო გამოხატულება. ამ პერიოდში ჩვენ დავამტკიცეთ, რომ მუსიკოსები არა მხოლოდ ხელოვნების, არამედ საზოგადოებრივი ცვლილებების აქტიური მონაწილეები ვართ. თუმცა, ვითარების გაანალიზების შემდეგ, მივიღეთ გადაწყვეტილება, რომ კერძო სექტორის წარმომადგენლები გაფიცვის ეტაპიდან უნდა გადავიდეთ მანიფესტაციაზე და ნაწილობრივ დავუბრუნდეთ სამუშაო რეჟიმს, რათა გავაგრძელოთ ჩვენი საქმიანობა და შევინარჩუნოთ ფინანსური სტაბილურობა.
ხელოვნებას შეუძლია მკაფიო მანიფესტაცია და საზოგადოების ყოფის გამოხატვა, განურჩევლად სტაბილური თუ რთული პერიოდისა.
ამავდროულად, ჩვენ რეკომენდაციას ვუწევთ სახელმწიფო სექტორს და საჯარო მოხელეებს გააგრძელონ საპროტესტო მოძრაობა გაფიცვის ფორმით. ეს არის უმნიშვნელოვანესი პროცესი, რომელიც მიგვიყვანს სამართლიანი პირობების უზრუნველყოფამდე.
ასევე გთავაზობთ, რომ მანიფესტაციის ფორმებზეც ერთად ვიმსჯელოთ და ვიმუშაოთ
საქართველოს მუსიკოსთა პროფესიული კავშირი სრულად ინარჩუნებს სოლიდარობას საზოგადოებრივი პროტესტის მიმართ და განაგრძობს ბრძოლას ქვეყნის დემოკრატიული და ევროპული მომავლისთვის. ჩვენი მოქალაქეობრივი ვალდებულებაა ვიყოთ იქ, სადაც ჩვენი ქვეყნის ბედი წყდება.
საქართველოს მუსიკოსთა პროფესიული კავშირი”
