მართალია, 2025 წლის Super Bowl-ის მუსიკალური შოუს მთავარი გმირი კენდრიკ ლამარი იყო, თუმცა, კანიე უესტმა მაინც შეძლო, ყურადღების ცენტრში აღმოჩენილიყო.
თამაშის მსვლელობისას, ტრადიციულად, მაყურებელმა არაერთი სარეკლამო რგოლი იხილა. მათ შორის იყო კანიე უესტის ბრენდის, Yeezy-ის რეკლამა. ვიდეორგოლში Ye ვერტიკალური ფორმატით ჩნდება, თითქოს საკუთარ თავს iPhone-ით იღებს სტომატოლოგის სავარძლიდან. არტისტს მუქი სათვალე უკეთია და ლურჯი ჰუდი აცვია. უესტი ამ დროს თითქოს ნარკოზისგან არის გაბრუებული და განმარტავს, რომ ეს Super Bowl-ის რეკლამაა საკუთარი მოდის ბრენდი Yeezy-ისთვის.
„როგორ ხართ, ხალხო? ამ რეკლამისთვის მთელი ფული ახალ კბილებში დავხარჯე,“ – ამბობს Ye და აუდიტორიას ბრილიანტებით მოჭედილ კბილებს აჩვენებს. „ამიტომ, ისევ iPhone-ით მომიწია გადაღება. შედით Yeezy.com-ზე,” – ასე ასრულებს უესტი ვიდეოს. Yeezy-ის ვებ-გვერდზე ამჟამად ბრენდის ახალი კოლექციის წინასწარი შეკვეთები და რამდენიმე მუსიკალური ჩანაწერი იყიდება.
ამ ვიდეოს პრემიერას წინ უძღოდა Ye-ს არაერთი ანტისემიტური, ჰომოფობიური და ე.წ. სიძულვილის ენით გაჯერებული განცხადება, რომელიც არტისტმა სოციალურ ქსელ X-ზე გამოაქვეყნა. პოსტში მან დადებითად მოიხსენია ადოლფ ჰიტლერი, საკუთარ თავს ნაცისტი უწოდა და დონალდ ტრამპს სთხოვა, Diddy გაათავისუფლოს. ამასთან, უესტმა პოსტში დამცინავად მოიხსენია შეზღუდული შესაძლებლობების მქონე ადამიანები და ღიად გამოაცხადა, რომ ქალებზე ფიზიკურადაც უძალადია.
ამ პოსტების გამო, სერიალ Friends-ის ვარსკვლავმა დევიდ შვიმერმა X-ის მფლობელ ილონ მასკს საჯაროდ მოუწოდა, რომ Ye პლატფორმიდან დაებლოკა. „ჩვენ არ შეგვიძლია, ამ შეშლილი ფანატიკოსის სიძულვილით სავსე, უაზრო ბოდვა შევაჩეროთ, მაგრამ შეგვიძლია, მას ამის გავრცელების საშუალება აღარ მივცეთ, ბატონო მასკ”. – დაწერა შვიმერმა. – „კანიე უესტს X-ზე 32.7 მილიონი გამომწერი ჰყავს – ეს ორჯერ მეტია, ვიდრე მთლიანად ებრაელთა რაოდენობა. მისი ავადმყოფური სიძულვილის რიტორიკა რეალურ ძალადობაში გადაიზრდება ებრაელების წინააღმდეგ.“
Ye-ს პოსტებზე არტისტის მეუღლემ, ბიანკა სენსორიმაც კი გამოთქვა შეშფოთება: „ჩვენ შორის განსხვავებები არსებობს, მაგრამ ის მაინც უსაზღვროდ მიყვარს. [ღმერთო,] გაგვიძლიერე კავშირი და მიანიჭე მას მოთმინებისა და მხარდაჭერის ძალა.“
