Mood Swing Calendar დავით დელგმასა და შოთა კოვალენკოს ერთობლივი პროექტია, რომლის ფარგლებშიც მათი პირველი სიმღერა Flower გამოვიდა. ორი განსხვავებული არტისტის კოლაბორაცია თანამედროვე პოპისა და ინდი ჟღერადობის ერთგვარ სინთეზს წარმოადგენს. პროექტი Heima-ს ლეიბლის ქვეშ გამოდის.
მებო ნუცუბიძე – Heima Production-ის თანადამფუძნებელი:
„Mood Swing Calendar განსხვავებული გამოცდილებების სინთეზით სრულიად ახალი ქართული მუსიკის შექმნას ცდილობს. მასში გაერთიანებული არიან, ერთი მხრივ, შოთა კოვალენკო, რომელიც ელექტრონული მუსიკის მსმენელისთვის ცნობილია Nava-ს სახელით, ხოლო, მეორე მხრივ, ავტორ-შემსრულებელი დავით დელგმა – ორი სრულიად განსხვავებული ჟანრისა და ჟღერადობის მუსიკოსი. ამ გაერთიანების შედეგი კი მოულოდნელად საინტერესო გამოვიდა, შესაბამისად, მისი გამოცემა გადავწყვიტეთ. ელექტრონული ბიტები, დრამისა და პოპის ელემენტები და ამას დამატებული დელგმას ხმა და ტექსტები – ეს ყველაფერი ქმნის Mood Swing Calendar-ს.”
Heima Production 5 წელია, ბაზარზე არსებობს. მათ ანგარიშზეა სერიალების, სარეკლამო რგოლების, ანიმაციებისა და სხვა არაერთი ცნობილი პროდუქტის აუდიო და მუსიკალური გაფორმება. ახლა კი კომპანიას ხმის ჩამწერი ლეიბლიც დაემატა, რომლის პრეზენტაციაც სექტემბერში შედგება.
