Tergi to Hudson-ის ჯაზფესტივალი საქართველოდან, ნიუ-იორკიდან, მაიამიდან და სხვა ქალაქებიდან ჩამოსული მუსიკოსების თანხლებით თანამედროვე ჯაზს, იმპროვიზაციას, ფანკსა და სხვადასხვა კულტურის მუსიკალურ ტრადიციებს ერთ სცენაზე მოუყრის თავს. პროგრამაში სამი მუსიკალური სეტია წარმოდგენილი, მათ შორის ქართველი საქსოფონისტისა და კომპოზიტორის, ხონძის პროექტი FUNKH.
ფესტივალს Connor Rohrer Trio გახსნის, რომლის შემადგენლობაში არიან გრემის მფლობელი პიანისტი კონორ რორერი, ბასისტი მაიკ რამოსი და დრამერი ლუკას აპოსტოლერისი. მაიამიში დაფუძნებული ჯგუფი მსმენელს ორიგინალურ კომპოზიციებთან ერთად ჯაზის სტანდარტების, ბროდვეის მუსიკალური ნაწარმოებებისა და თანამედროვე სიმღერების საკუთარ არანჟირებებს შესთავაზებს.
საღამოს მეორე ნაწილი ბრუკლინში დაფუძნებულ მუსიკალურ პროექტს, TM Street Band-ს დაეთმობა, რომელიც 2016 წელს გრემიზე ნომინირებულმა მულტიინსტრუმენტალისტმა და კომპოზიტორმა ტალ მაშაიახმა დააარსა. ჯგუფის მუსიკა ჯაზის, ფანკის, ბლუზის, ლათინური მუსიკისა და ახლო აღმოსავლეთის მუსიკალური ტრადიციების ელემენტებს აერთიანებს. პროექტის გამორჩეული მახასიათებელია ინსტრუმენტების არასტანდარტული კომბინაცია, რომელშიც ჰარმონიკა, ტრომბონი და ალტის საქსოფონი მნიშვნელოვან როლს ასრულებს.
TM Street Band-ის შემადგენლობაში არიან ტალ მაშაიახი (ბასი), იოტამ ბენ ორი (ჰარმონიკა), ხონძი (საქსოფონი), იონათან პელედი (ტრომბონი) და დევიდ ხიმენესი (დასარტყამი ინსტრუმენტები).
ფესტივალს დაასრულებს FUNKH – ბრუკლინში მოღვაწე ქართველი საქსოფონისტისა და კომპოზიტორის, ხონძის მუსიკალური პროექტი. FUNKH-ის შემოქმედება ორიგინალურ კომპოზიციებს, ჯაზურ იმპროვიზაციასა და ფანკის ენერგიულ რიტმებს აერთიანებს. პროექტის მუსიკალური სტილი თავისუფალი ფორმითა და სხვადასხვა ჟანრის ელემენტების შერწყმით გამოირჩევა.
Tergi to Hudson-ზე FUNKH-ის შემადგენლობაში ხონძისთან ერთად პაპუნა შარიქაძე და ლუკა თოფურია (კლავიში), ტალ მაშაიახი (ბასი), ალონ ბენჯამინი (დასარტყამი ინსტრუმენტები) და როი ბან ბაშატი (გიტარა) წარდგებიან.
ფესტივალის მეორე გამოშვება 17 ოქტომბერს, ნიუ-იორკის The Cutting Room-ში გაიმართება, სადაც ფანკისა და მუსიკალური იმპროვიზაციის მრავალფეროვანი პროგრამა შესრულდება.
ბილეთების შეძენა შესაძლებელია ბმულზე.
