სადაც არ უნდა იყოს ახლა, დუა ლიპა ალბათ შამპანურს ხსნის თავისი კარიერის პირველი ბრილიანტის სერტიფიკატის აღსანიშნავად.
17 ნოემბერს მომღერლის ლეიბლმა ინსტაგრამზე პოსტი გამოაქვეყნა, რომელშიც ლიპას ცხრა ახალი RIAA-ს სერტიფიკატის შესახებ იუწყებოდა. მათ შორისაა 2020 წლის ალბომის, Future Nostalgia-ს ჰიტის Levitating 13-გზის პლატინის სტატუსი, რაც ავტომატურად ნიშნავს ბრილიანტის სერტიფიკატს (სიმღერა ბრილიანტის სტატუსს მაშინ აღწევს, როდესაც მისი გაყიდვებისა და სტრიმინგის ეკვივალენტური მაჩვენებელი 10 მილიონ ერთეულს უტოლდება).
გარდა ამისა, მომღერალმა კიდევ რამდენიმე მნიშვნელოვანი სერტიფიკატი მოიპოვა: 2017 წლის სინგლი IDGAF – ხუთგზის პლატინა, 2020 წლის Break My Heart – ოთხგზის პლატინა და 2020 წლის Physical – სამგზის პლატინა. მისი რამდენიმე სხვა ნამუშევარიც ორმაგი პლატინის სტატუსით დაჯილდოვდა, მათ შორის 2017 წლის სადებიუტო ალბომი Dua Lipa, 2021 წლის სინგლი Love Again და 2023 წლის ჰიტი Houdini. 2024 წლის სინგლმა Illusion პლატინის სტატუსი მიიღო, ხოლო 2019 წლის სიმღერამ Future Nostalgia – ოქროს სერტიფიკატი.
სადღესასწაულო პერიოდში სასიხარულო სიახლე აქვს რიანასაც – მისმა ოთხმა სინგლმა RIAA-ს ახალი სტატუსები მოიპოვა. მათ შორის ლიდერობს 2011 წლის ალბომის, Talk That Talk-ის ჰიტი Where Have You Been, რომლის პროდიუსერებიც Dr. Luke, Cirkut და კელვინ ჰარისი არიან. სიმღერა ახლა უკვე ექვსგზის პლატინის სერტიფიკატის მფლობელია. ასევე, ორმაგი პლატინის სერტიფიკატი მიიღო 2012 წელს ჯეი-ზისთან ერთად ჩაწერილმა სიმღერამ და რიანას მეექვსე ალბომის სახელწოდების მქონე კომპოზიციამ Talk That Talk. ამავე ალბომის კიდევ ერთი სიმღერა You Da One ოთხგზის პლატინის სტატუსის მფლობელი გახდა. ოთხგზის პლატინის სერტიფიკატით დაჯილდოვდა თავად ალბომიც.
იანვარში რიანამ 2016 წლის ალბომის, ANTI-ს გამოსვლიდან 10 წლის იუბილე აღნიშნა. მაშინ RIAA-მ ალბომის ცხრა სიმღერას ახალი სერტიფიკატები მიანიჭა. მათ შორის იყო მომღერლის რიგით მერვე ბრილიანტის სტატუსიც, რომელიც Billboard Hot 100-ის მეხუთე ადგილზე გასულმა ჰიტმა Love on the Brain მოიპოვა. ახალი სერტიფიკატების წყალობით, რიანამ კიდევ უფრო განამტკიცა რეკორდი, როგორც ქალმა შემსრულებელმა, რომელსაც RIAA-ს ისტორიაში ყველაზე მეტი ბრილიანტის სერტიფიკატის მქონე სინგლი აქვს.