2018 წლის ჰიტის One Kiss შემდეგ, შოტლანდიელი დიჯეი კელვინ ჰარისი და ინგლისელი მომღერალი დუა ლიპა რეპერ იანგ თაგთან ერთად კომპოზიციას Potion და მასზე გადაღებულ ვიდეორგოლს ავრცელებენ.
Potion ჰარისის ახალი ალბომის Funk Wav Bounces Vol 2 სინგლი გახლავთ. სტუდიური ჩანაწერი მიმდინარე წლის ზაფხულში გამოიცემა. მის პირველ ნაწილში კი, რომელიც 2017 წელს გავრცელდა და Billboard 200-ის მეორე პოზიციაზეც მოხვდა, იანგ თაგი, ფრენკ ოუშენი, ფარელ უილიამსი, ნიკი მინაჟი, კეტი პერი და ჯგუფი Migos მონაწილეობდნენ.
რაც შეეხება One Kiss-ს, ტრეკი დუა ლიპას ალბომის Dua Lipa ალტერნატიულ გამოცემაში შევიდა და 2018 წელს Billboard-ის საცეკვაო/ელექტრონული კომპოზიციების ჩარტში მეორე პოზიცია დაიკავა.
ადამ რიჩარდ ვაილსმა, სასცენო სახელით Calvin Harris, შემოქმედებითი მოღვაწეობა 2002 წელს დაიწყო. გრემის მფლობელ მუსიკოსს განსაკუთრებული წარმატება კომპოზიციებმა Summer, This Is What You Came For და I Need Your Love მოუტანა. ის პირველი ბრიტანელი არტისტი გახდა, ვინც პლატფორმა Spotify-ზე მილიარდზე მეტი მოსმენა დააგროვა.
