ბობ დილანის თინეიჯერობის ასაკში დაწერილი სასიყვარულო წერილების კოლექცია, რომელიც მან თავის სკოლის გულისწორს მიუძღვნა ბოსტონში აუქციონზე გაიყიდება.
ახალგაზრდა ბობ დილანმა 1957-59 წლებში, ბარბარა ენ ჰიუიტს ორმოცდაორი სასიყვარულო წერილი მისწერა, რომელიც ჯამში ას ორმოცდაათ გვერდს ითვლის. კომპანია RR Auction-ის მიერ აუქციონზე გასატანი წერილები აქამდე არასდროს გასაჯაროებულა. ფოლკ-როკის საკულტო მომღერლის ეს პერიოდი საზოგადოებისთვის ნაკლებად ცნობილია.
დილანის დიდმა გულშემატკივარმა და RR Auction-ის აღმასრულებელმა ვიცე-პრეზიდენტმა ბობ ლივინგსტონმა, განაცხადა: „ეს არის მეოცე საუკუნის ერთ-ერთი ყველაზე მნიშვნელოვანი კულტურული არქივი. კოლექცია, პირად სასიყვარულო წერილებს მოიცავს და ამბავს დილანის ცხოვრების შესახებ თავად ავტორი, პირველ პირში მოგვითხრობს“.
ჰიუიტის ქალიშვილმა ეს წერილები დედამისის გარდაცვალების შემდეგ, 2020 წელს აღმოაჩინა. წერილები კონვერტებში დილანის მიერაა ხელმოწერილი. აუქციონზე მისი საწყისი ფასი – ორას ორმოცდაათი ათას დოლარს შეადგენს, ფსონის დადება კი 17 ნოემბერს შეწყდება.
კომპანია RR Auction – წერილების ზუსტ შინაარს არ აქვეყნებს, თუმცა აუქციონის სახლის თქმით წერილები დილანის თინეიჯერობის გატაცებებს და განცდებს გადმოსცემს. წერილებში საუბარია მის სიყვარულზე ჰიუიტის მიმართ, პოეზიაზე, მუსიკალურ გემოვნებაზე, ტანსაცმელზე და მანქანებზე.
სამწუხაროდ როგორც უმეტესი თინეიჯერული რომანი, ეს ისტორიაც დასრულდა. ერთ-ერთ ბოლო წერილში, ნობელის პრემიის მომავალი ლაურეატი ენ ჰიუიტს მისი გაგზავნილი ფოტოების დაბრუნებას სთხოვს.
მაგრამ როგორც ჩანს, დილანს ის არ დავიწყებია. ჰიუიტის ქალიშვილის თქმით დილანმა დედამისს 1960-იანი წლების ბოლოს დაურეკა და კალიფორნიაში ჩასვლა სთხოვა, რაზეც ჰიუიტიმ უარით უპასუხა.
ჟღალ თმიანი ჰიუიტი, ლივნიგსტონის თქმით, დილანის სიმღერების შთაგონების წყაროც იყო. მათ შორის არის სიმღერა Tangled Up in Blue, სადაც ფრაზა: „თუ მისი თმა კვლავ წითელია“ (If her hair was still red) ჰიუიტის უკავშირდება.
ენ ჰიუიტი საცხოვრებლად სხვაგან გადავიდა და დაქორწინდა, თუმცა შვიდი წლის შემდეგ 1970-იანი წლების ბოლოს განქორწინდა და მას ოჯახი აღარ შეუქმნია.
