ნუცა თოფურია მარჯანიშვილის თეატრის სცენაზე მსმენელის წინაშე პირველი სოლო-კონცერტით წარდგება. კონცერტს „მოვალ” ერთი თვით ადრე წინ უძღოდა იმავე სახელწოდების სადებიუტო ალბომის გამოცემა. ალბომში შესულია 10 სიმღერა, რომელთა უმრავლესობაც ყველასთვის ნაცნობი კომპოზიციების ახლებური ვერსიებია. დღევანდელი კონცერტიც სწორედ ამ ალბომის პრეზენტაცია იქნება.
ნუცა თოფურია:
„ალბომს და შესაბამისად, კონცერტსაც ჰქვია „მოვალ”. ამას რამდენიმე ახსნა აქვს. პირველ რიგში, ყველაზე დიდი წარმატება ამ სიმღერამ მომიტანა. მეორეა, რომ სწორედ მისი მოსმენის შემდეგ გადაწყდა ჩემი სადებიუტო ალბომის ჩაწერა. მესამე და ამ სიტყვის ჩემეული ახსნა კი ის არის, რომ ძალიან მინდა, მსმენელის გულებამდე მოვიდე.”
ნუცა თოფურიასთან ერთად კონცერტში მონაწილეობას მიიღებენ გიორგი ცხადაძე, ნოდარიკო ხუციშვილი, ლუკა ჭოხონელიძე, სანდრო გეგეჭკორი და ლუკა თოფურია. დაუკრავს ბენდი „ნიუტონი”. პროექტზე Bravo Records-მა იმუშავა.
