მეტალიკა 2023 წელს ახალი ალბომითა და ტურნეთი ბრუნდება. ჯგუფის მე-12 სტუდიური ალბომი სახელწოდებით 72 Seasons 14 აპრილს გამოვა. მუსიკალურ პლატფორმებზე გავრცელდა მასში შემავალი ერთ-ერთი კომპოზიცია “Lux Æterna” (იხილეთ ვიდეო ქვევით).
„ჩვენი ცხოვრების პირველი 18 წელი განსაზღვრავს ჩვენს არსს. კონცეფციას, თუ ვინ ვართ – ის, ვინც მშობლებმა გვითხრეს. ვფიქრობ, ყველაზე საინტერესო ნაწილი უწყვეტი შესწავლაა ამ საბაზისო რწმენის და იმის, თუ როგორ მოქმედებს ეს რწმენა დღეს ჩვენ მიერ სამყაროს აღქმაზე. ჩვენი ზრდასრული ცხოვრების დიდი ნაწილი ბავშვობის გამოცდილების განახლება ან მასზე რეაქციაა. ჩვენ ბავშვობის ტყვეები ვართ, ან ამ ტყვეობისგან ვთავისუფლდებით,” – განაცხადა ჯგუფის ვოკალისტმა ჯეიმზ ჰეტფილდმა ალბომის წარდგენისას.
ბენდმა ასევე დააანონსა 2023-2024 წლის მასშტაბური მსოფლიო ტურნე, რომლის ფარგლებშიც ყველა ქალაქში, რომელსაც ისინი ეწვევიან, 2 დღის განმავლობაში ერთმანეთისგან განსხვავებულ პროგრამას დაუკრავენ.
ტურნე 27 აპრილს ამსტერდამში დაიწყება. ამას მოჰყვება ორი ღამე პარიზში, ჰამბურგში და ასე გაგრძელდება 12 ნოემბრამდე. ამის შემდეგ კონცერტები უკვე 2024 წლის 24 მაისს განახლდება და აგვისტოში ამერიკაში დასრულდება.
ნახეთ ვიდეოკლიპი კომპოზიციაზე “Lux Æterna” რომელიც ახალ ალბომში შევა.
