ცნობილმა ბოიბენდმა, სახელწოდებით Backstreet Boys სადღესასწაულო სიმღერა – Christmas in New York გამოაქვეყნა. ვიდეოში ჯგუფის ხუთივე წევრი მონაწილეობს. კლიპის მსვლელობისას, ვხედავთ ჯგუფის წევრების ანიმაციურ ფიგურებსაც, რომლებიც საშობაოდ მორთული ნიუ-იორკის ქუჩებში სეირნობენ.
ვიდეოში ჩანს სანტას ფორმაში ჩაცმული ანიმაციური ფიგურა, დათოვლილი ცენტრალური პარკი, 34-ე ქუჩაზე მდებარე Macy-ის ცნობილი სავაჭრო ცენტრი, განათებული ტაიმს-სკვერი. ტაიმს-სკვერის ანიმაციური ვერსიის სარეკლამო ეკრანებზე Backstreet Boys-ის წევრები ჩანან.
Christmas in New York შესულია ბოიბენდის LP-ში, სახელწოდებით A Very Backstreet Christmas, რომელიც 14 ოქტომბერს გამოიცა. ეს არის Backstreet Boys-ის სადღესასწაულო სიმღერების პირველი კოლექცია და ასევე, ბოლო სამ წელიწადში ბენდის პირველი სტუდიური ნამუშევარი.
გარდა Christmas in New York-ისა, ჯგუფის ახალი ალბომი აერთიანებს სადღესასწაულო თემატიკის ისეთ სიმღერებს, როგორიც არის: White Christmas, Silent Night და Have Yourself a Merry Little Christmas.
