23 დეკემბერს, პარასკევს საღამოს, „რუსტერ” ბარში ბაკურ ბურდულის სოლო კონცერტი გაიმართა. ბენდის შემადგენლობაში იყვნენ: ბას გიტარისტი – გიორგი მარი, გიტარისტი – გოგა კაკულია, დრამი – აჩი კევლიშვილი და კლავიში – ანი ცინცაძე.
მომღერლის თქმით ბოლო სამი წლის განმავლობაში მუსიკალური პაუზა ჰქონდა, თუმცა ახლა, ახალი შემართებით გადაწყვიტა მუსიკაში აქტიურად დაბრუნება და მომავალშიც მსმენელს ბევრ სიახლეს შესთავაზებს.
„დაახლოებით ოთხი წელია სოლო კონცერტი არ მქონია. ამ ეტაპზე სინგლებზე უფრო ვმუშაობთ, ათი სიმღერის ჩაწერას უცებ აზრი არ აქვს, ამიტომ ვაპირებთ ერთი-ორი ახალი სიმღერა ჩავწეროთ და გამოვუშვათ. დავიწყე ისევ მოღვაწეობა, დავბრუნდი მუსიკაში და ეს ყველაფერი ძალიან მახარებს. ძალიან მინდა, რომ სულ აქ ვიყო და არსად წავიდე.“ – თქვა ბილბორდთან საუბრისას მომღერალმა.
ბაკურ ბურდულმა „რუსტერში“ ძველ მონატრებულ სიმღერებთან ერთად ორი ახალი სიმღერაც შეასრულა.
„ეს პერიოდი, როცა არ ვუკრავდი, სულ ვმუშაობდი და ვწერდი მუსიკას. ამ საღამოს ორი ახალი სიმღერაც შევასრულეთ „მომავალ ღამეს” – საკმაოდ ძველი, მაგრამ ხელახლა აღმოჩენილი სიმღერაა, რომელიც ჩემ მეგობრებს ძალიან მოსწონდათ, გადავაკეთეთ და ახლებურად წარმოვადგინეთ და მეორე სიმღერაა – „შავს და თეთრს”. უახლოეს მომავალში მინდა რომ კლიპიც გადავიღოთ.“ – აღნიშნა ბაკურ ბურდულმა.
„გვინდოდა ჩვენი ბარი დაგველინკა გემოვნებიან მუსიკასთან. იმის გამო, რომ თბილისში ძირითადად ელექტრონული მუსიკის საღამოები ეწყობა და ცოცხალი მუსიკა უფრო ნაკლებად არის, გადავწყვიტეთ, ხელი შეგვეწყო ცოცხალი მუსიკისთვის. ათამდე კონცერტი გვქონდა. ყველა კონცერტზე თავისუფალი იყო დასწრება. ბაკურ ბურდულის კონცერტი ძალიან მნიშვნელოვანი ღონისძიება იყო ჩვენთვის, გამომდინარე იქიდან, რომ თავად არტისტს საკმაოდ დიდი ხანი არ ჰქონია სოლო კონცერტი. ჩვენ აღმოვჩნდით ის სივრცე, სადაც ამდენი ხნის შემდეგ ბაკურმა დაუკრა, რაც ძალიან გვახარებს.”- ნიკოლოზ გიგაური – „რუსტერის” ბარის ერთ-ერთი დამფუძნებელი.
