მაყურებელი ემი უაინჰაუსის შესახებ გადაღებულ ბიოგრაფიულ ფილმს იხილავს. Back to Black – ასე ჰქვია ტეილორ ჯონსონის სარეჟისორო ნამუშევარს და მასში მთავარ როლს 26 წლის მსახიობი, მარისა აბელა ასრულებს.
ახლახან, ტეილორ ჯონსონმა პირველი კადრი გაავრცელა, სადაც მარისა აბელას უაინჰაუსისათვის დამახასიათებელი ვარცხნილობით ვხედავთ.
აბელამ ინსტაგრამზე თავადაც გამოაქვეყნა ფოტოები. ერთ-ერთ მათგანში მსახიობი უაინჰაუსის გრაფიტის წინ პოზირებს.
ფილმი Back to Black კინოწარმოებისა და დისტრიბუციის კომპანია StudioCanal-ის პროდუქტია. პროექტს მხარს ემი უაინჰაუსის საავტორო უფლებების მემკვიდრეები უჭერენ. სცენარის ავტორი მეთ გრინჰელია. ბიოგრაფიული ფილმის სიუჟეტის დეტალები ამ დრომდე უცნობია.
Back to Black გრემის მფლობელი ემი უაინჰაუსის ყველაზე ცნობილი ალბომის სახელწოდებაა. უაინჰაუსი 2011 წელს 27 წლის ასაკში გარდაიცვალა. მომღერალი ნარკოტიკებსა და ალკოჰოლზე იყო დამოკიდებული.
