31 იანვარს Netflix-ზე პამელა ანდერსონის შესახებ გადაღებული დოკუმენტური ფილმი, სახელწოდებით Pamela, A Love Story გამოვა. ამავე დღეს ანდერსონის მემუარები – Love, Pamela გამოიცემა. დოკუმენტურ ფილმში, ისევე, როგორც ავტობიოგრაფიულ წიგნში, მსახიობი გულახდილად საუბრობს და თავის პირად ისტორიას ჰყვება. ახლახან, პამელა ანდერსონმა მემუარებიდან ნაწყვეტი გააზიარა, რომელშიც როკ ვარსკვლავ ტომი ლისთან ურთიერთობაზე საუბრობს.
„მასთან ურთიერთობის პერიოდი, შესაძლოა, ჩემი ცხოვრების ის ერთადერთი მონაკვეთია, როდესაც ნამდვილად შეყვარებული ვიყავი.“ – წერია ჟურნალ People-ში გამოქვეყნებულ ნაწყვეტში.
პამელა ანდერსონი და ტომი ლი 1995 წელს დაქორწინდნენ. როგორც ანდერსონმა აღნიშნა, ერთად ყოფნის პერიოდში ისინი „ყოველგვარი წესების გარეშე ერთობოდნენ“.
მას შემდეგ, რაც მათი ინტიმური ხასიათის ჩანაწერი მოიპარეს და გაავრცელეს, წყვილის ურთიერთობა დაიძაბა და საბოლოოდ განქორწინებით დასრულდა.
„ამან ჩვენი ურთიერთობა დაანგრია. ადამიანებს დღემდე სჯერათ, რომ მსგავსი შემთხვევისაგან სარგებელი შეუძლიათ ნახონ, ეს მიუტევებელია.“ – წერს პამელა ანდერსონი.
წყვილს ორი საერთო ვაჟი ჰყავს – 26 წლის ბრენდონი და 25 წლის დილანი. როგორც მსახიობი იხსენებს, 1998 წელს, როცა შვიდი თვის დილანი ხელში ეჭირა, ტომი ლიმ მასზე ფიზიკურად იძალადა, რა დროსაც ბავშვებიც დაზიანდნენ. შემთხვევის შესახებ ანდერსონმა პოლიციას დაუყოვნებლივ აცნობა. ტომი ლი ექვსი თვით დააპატიმრეს, პამელამ კი განქორწინების მოთხოვნით განცხადება შეიტანა.
„განქორწინება ჩემი ცხოვრების ურთულესი მომენტი იყო. ვერ ვიჯერებდი, რომ ჩემს საყვარელ ადამიანს შეეძლო ის ჩაედინა, რაც იმ ღამით მოხდა. ორივე განადგურებული ვიყავით, მაგრამ მე შვილები უნდა დამეცვა“ – წერს პამელა ანდერსონი თავის მემუარებში. – „მიუხედავად ამისა, ტომი ჩემი შვილების მამაა და მისი ყოველთვის მადლობელი ვიქნები.“
