ფარელ უილიამსი „ელისეის სასახლეს“ სპეციალური ვიზიტით ესტუმრა, სადაც საფრანგეთის პრეზიდენტ ემანუელ მაკრონს შეხვდა. ვარსკვლავმა და ქვეყნის პირველმა პირმა ინტერნეტ უსაფრთხოებასა და ადამიანის უფლებებთან დაკავშირებული საკითხები განიხილეს.
„უსაფრთხო სივრცე ყველასათვის, დაცული და გახსნილი, მშვიდი და დემოკრატიული, რომელიც პატივს სცემს ადამიანის უფლებებს. სწორედ ასეთი უნდა იყოს ინტერნეტი, განსაკუთრებით კი – ბავშვებისათვის. ეს ჩვენთვის ერთ-ერთი უპირველესი გამოწვევაა. ხელოვანებო, შემოგვიერდით და ხმა ერთად ავიმაღლოთ. ფარელ უილიამს, მადლობა ჩართულობისათვის.“ – ვკითხულობთ მაკრონის ტვიტში. პრეზიდენტის მიერ twitter-ზე გამოქვეყნებულ ფოტოზე, მაკრონი და უილიამსი შავ კლასიკურ კოსტიუმებში პოზირებენ.
როგორც მედია პლატფორმა RTL იუწყება, ემანუელ მაკრონის სპიკერი შეხვედრას კომენტარით გამოეხმაურა. „ფარელ უილიამსი აქტიურად არის ჩართული ციფრული სამყაროს გამოწვევებთან და ინტერნეტის მავნე შედეგებთან გამკლავების პროცესში. ეს კარგია, რადგან მას შეუძლია, ხმა დიდ აუდიტორიას მიაწვდინოს.“ – აღნიშნულია განცხადებაში.
ფარელ უილიამსი პარიზში გამართულ საქველმოქმედო მუსიკალურ საღამოზეც გამოჩნდა. აღნიშნული საქველმოქმედო ღონისძიებების სერიას ორგანიზებას ქვეყნის პირველი ლედი, ბრიჯიტ მაკრონი უწევს.
ნახეთ ფარელ უილიამსისა და ემანუელ მაკრონის ერთობლივი ფოტო:
A safe place for all, secure and open, peaceful and democratic, which respects human rights. That's what the Internet must be and remain, especially for our children. It's one of our battles. Artists, join us, and speak out! Thank you @Pharrell for your commitment. pic.twitter.com/84XAstay2m
— Emmanuel Macron (@EmmanuelMacron) January 24, 2023
