Depeche Mode-მა ახალი სიმღერა და ვიდეოკლიპი გააზიარა და ალბომის გამოცემის თარიღიც გაამხილა.
ვიდეოკლიპში დეივ გეენი და მარტინ გორი ცარიელ ქუჩაში ერთნაირი ხელჯოხებით დადიან, რომლებზეც თავის ქალებია გამოსახული. შემდეგ კი შენობის სახურავზე ჭადრაკის პარტიის სათამაშოდ სხდებიან.
„ვიცით, რომ ისევ მოჩვენებები გავხდებით” – მღერიან მისამღერში.
„ჩემთვის Ghost Again მელანქოლიისა და სიხარულის იდეალურ ბალანსს იჭერს” – თქვა გეენმა. გორმა კი დაამატა: „ხშირად არ ხდება ისე, რომ ისეთ სიმღერას ვწერთ, რომლის მოსმენაც არ მბეზრდება. ბედნიერი ვარ, რომ მისი გაზიარება შეგვიძლია.”
Ghost Again ჯგუფის მე-15 სტუდიურ ალბომში, სახელწოდებით Memento Mori შედის, რომელიც 24 მარტს გამოვა. ეს 2017 წლის შემდეგ ბენდის პირველი სტურიური ალბომი იქნება. (ასევე პირველი ალბომი იქნება მათი წევრის, ენდი ფლეტჩერის გარდაცვალების შემდეგ.)
ნახეთ Depeche Mode-ის ვიდეოკლიპი სიმღერაზე Ghost Again.
