ამერიკული მუსიკალური მეგა შოუ American Idol დაიწყო და პროექტი ადრეული მოსმენების ვიდეოებს აზიარებს. ეს სატელევიზიო კონკურსის ის ეტაპია, როცა ჟიური და აუდიტორია შოუბიზნესის არაერთ მომავალ რჩეულს პირველად ხვდება. ზოგიერთი მონაწილე მხოლოდ ვოკალური შესაძლებლობებით გამოირჩევა, ზოგჯერ კი კონკურსანტს იმდენად ამაღელვებელი ისტორია აქვს, რომ ეს ჟიურის დიდ ყურადღებას იპყრობს.
ახლახან, American Idol-ის ახალ სეზონზე მოსმენების ტურში 21 წლის ტეხასელი ტრეი ლუისი წარდგა. მან ჟიური თავისი ვოკალით მოხიბლა, როცა ვისკი მაიერსის 2018 წლის სიმღერა, სახელწოდებით Stone შეასრულა.
კეტი პერის, ლიონელ რიჩისა და ლუკ ბრაიანის ოვაციების შემდეგ, ბრაიანმა მომღერალს ჰკითხა, რატომ მონაწილეობდა პროექტში. როგორც ლუისმა თქვა, თავისმა არაერთმა საყვარელმა ვარსკვლავმა სწორედ იგივე გზა გაიარა, სანამ მსოფლიო ცნობადობას მოიპოვებდა.
მეორე მიზეზის დასახელებისას, ლუისმა ჟიურის ემოციური ისტორია გაუზიარა, რის გამოც კეტი პერიმ ცრემლები ვერ შეიკავა. ლუისმა კიდევ ერთხელ აღნიშნა, რომ ის ტეხასიდან, სანტა ფედან არის. ქალაქიდან, სადაც 2018 წელს საჯარო სკოლაში მასობრივი სროლის დროს რვა მოსწავლე და ორი მასწავლებელი ტრაგიკულად დაიღუპა. ლუისმა თქვა, რომ ის სთავად წორედ ამ სკოლის მოსწავლე იყო და შეიარაღებული თავდამსხმელის სროლას გადაურჩა.
„მე ბევრი მეგობარი დავკარგე“ – თქვა ლუისმა და აღნიშნა, რომ ხელოვნების გაკვეთილს ესწრებოდა, როცა თავდამსხმელმა გვერდით საკლასო ოთახის კარი შეაღო. „ეს საკმაოდ ნეგატიურად აისახა და 2018 წლის შემდეგ, სანტა ფეს ცუდი რეპუტაცია აქვს“ – თქვა კონკურსანტმა.ამ ისტორიის შემდეგ კეტი პერი ატირდა. „ჩვენმა ქვეყანამ იმედი გაგვიცრუა“ – პერიმ ლუისს ხმამაღლა მიმართა – „ეს არ არის ნორმალური. შენ აქ უნდა იდგე და მღეროდე იმის გამო, რომ მუსიკა გიყვარს. არა იმიტომ, რომ ეს საშინელება გამოიარე. შენ არ უნდა კარგავდე მეგობრებს. იმედი მაქვს, ადამიანებს შეახსენებ, რომ შეცვლა გვჭირდება.“
